"16 წლის ასაკში წავიდა აფხაზეთის ომში... მეთაურმა სცადა სახლში გაეშვა, არ მიდიოდა..." - ამირან სალუქვაძე ილია ელოშვილზე ემოციურ ისტორიას აქვეყნებს

თადარიგის გენერალი, პოლიტიკის ანალიტიკოსი ამირან სალუქვაძე სოციალურ ქსელში, თბილისის მერის მოადგილის ილია ელოშვილის გარდაცვალებასთან დაკავშირებით სტატუსს აქვეყნებს და წერს:

"ერთი შტრიხი ილია ელოშვილის ბიოგრაფიიდან.

დღეს მომიყვა მისმა მაშინდელმა მეთაურმა.

16 წლის ასაკში წავიდა აფხაზეთის ომში.

მეთაურმა სცადა სახლში გაეშვა.

არ მიდიოდა.

ბოლოს უთხრა, გიბრძანებ და ბრძანება უნდა შესრულდესო.

ილიას ისღა დარჩენოდა, სახლში წასულიყო.

ორი კვირის შემდეგ, ისევ ჩადის აფხაზეთში, თავის ნაწილში.

მეთაური ეკითხება, რატომ ჩამოხვედიო, ხომ გიბრძანე სახლში წასვლაო?

ილიამ უპასუხა, ბრძანება შევასრულე, სახლში წავედი და ისევ ჩამოვედიო.

მგონი ბევრზე მეტყველებს?!

დასანანია...

ოჯახს და ახლობლებს გაძლებას ვუსურვებ და გულით ვუსამძიმრებ", - წერს სალუქვაძე.

ილია ელოშვილი 47 წლის იყო, მას მეუღლე და ორი შვილი დარჩა. ელოშვილი თბილისის მერის მოადგილის თანამდებობას 2021 წლიდან იკავებდა, იქამდე ენერგეტიკის მინისტრი, მანამდე კი ენერგეტიკის მინისტრის მოადგილე იყო.

ილია ელოშვილის გარდაცვალების ფაქტთან დაკავშირებით შინაგან საქმეთა სამინისტრომ გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.

ამავე თემაზე:

დავკარგე მეგობარი, რომელსაც თვალდახუჭული ვენდობოდი - კალაძე ელოშვილის გარდაცვალებაზე