"ამ დღეს წმინდა ნიკოლოზის ხატს სრულიად განსაკუთრებული დავალება მივეცი" - ნინო დანელია 9 აპრილის მოვლენებზე

პროფესორი ნინო დანელია 9 აპრილის მოვლენებზე, სოციალურ ქსელში წერს:

"ზუსტად აღარ მახსოვს რა დღეა, მაგრამ 9 აპრილის შემდეგი პერიოდია.

ჩვენთვის ტრაგიკული და ამავე დროს იმედიანი დღე, რომ ოდესმე სსრკ-გან თავისუფალი ქვეყნის თავისუფალი მოქალაქეები ვიქნებით.

წმინდა ნიკოლოზის ხატი ბებიამ მაჩუქა ბავშვი როცა ვიყავი და მითხრა, რომ წმინდა ნიკოლოზს სასწაულების მოხდენა შეეძლო.

მეც მეტი რა მინდოდა, ხან ნიშნის გამოსწორებას ვთხოვდი, ხან ბოტასებს, ხან კატის კნუტს და ვიყავით ასე.

ამ დღეს ხატს სრულიად განსაკუთრებული დავალება მივეცი.

პირველად და უკანასკნელად მეჭირა ხელში ასე საჯაროდ.

დარწმუნებული ვიყავი, რომ სასწაულს მოახდენდა და საქართველოს სსრკ-გან გაათავისუფლებდა.

არ ვიცოდი მაშინ, რომ დამოუკიდებლობას კი მივიღებდით, ბევრსაც ვიბრძოლებდით მის შესანარჩუნებლად, სსრკ არ გაქრებოდა, რუსეთად იქცეოდა და ისევ, 30 წლის მერეც ჩემი ქვეყნის დამონება მოუნდებოდა. 

ზუსტად ვიცი, რომ მიუხედავად იმისა, რომ ამირანი გვარგუნა ბედმა თავის ჰა და ჰა გასაწყვეტი ჯაჭვით, რომელიც სწორედ მაშინ მთელდება, როცა გგონია, უნდა გაწყდეს, მაინც გავწყვეტთ, მაინც თავისუფალი იქნება ეს ქვეყანა და თავისუფლებისთვის მეომარი თუ მშრომელი ყველა ადამიანის სული მოისვენებს.

ჩვენც მოვისვენებთ და იქნებ სხვა დღის წესრიგის შექმნაც მოვახერხოთ, სადაც მთავარი ღირებულებები თავისუფლება, თანასწორობა, ერთმანეთის თანაგრძნობა და სიკეთე იქნება.

ვიცი, გაწყდება ჯაჭვი და საბოლოოდ გავხდებით ევროპული ოჯახის თანასწორი წევრი ქვეყანა.

წინ რთული და გრძელი გზაა.

16:00 საათზე რუსთაველზე შევხვდებით ჩვენი და თქვენი თავისუფლებისთვის",- წერს დანელია.

ასევე დაგაინტერესებთ:

📍დეგნანი: საბჭოთა ძალების მიერ დამოუკიდებლობის მხარდამჭერ დემონსტრანტებზე თავდასხმისა და მათი დახოცვის სასტიკი ქმედება მწარე მოგონებად სამუდამოდ დარჩება

📍"ლიანა ელიავამ გადაწყვიტა 9 აპრილის მოვლენებისთვის მიეძღვნა ფილმი, რომელსაც უფლის ანგელოზები ერქვა,სამწუხაროდ ცოტა ხანში ეს ფილმი დაიხურა" - ია ფარულავა