"ბატონო ზელენსკი, თქვენ რუსეთს ეომებით თუ საქართველოს?" - ღია წერილი უკრაინის პრეზიდენტს

ადვოკატი მაიკო ელოშვილი სოციალურ ქსელ ფეისბუკში უკრაინის პრეზიდენტ ვოლოდიმირ ზელენსკის ღია წერილით მიმართავს:

"ბატონო ზელენსკი, თქვენ რუსეთს ეომებით თუ საქართველოს?..

ელჩი ჩვენგან გაიწვიეთ;

ჩვენს ხელისუფლებას ყოველდღიურ რეჟიმში ლანძღავთ;

კრიმინალი ნაცები კიდევ უფრო ჩაიხუტეთ და უკრაინა მათი კეთილდღეობის პოლიგონად აქციეთ;

საქართველოს ომში ჩათრევას ცდილობთ;

თქვენი განცხადებებით ჩვენი ქვეყნის სტაბილურობას ხელყოფთ და საკუთარი მოსახლეობის წამებასა და მკვლელობაში ბრალდებული ბანდის პოლიტიკურ რეანიმირებას ცდილობთ;

რუსეთმა ქართულ პროდუქტზე ემბარგო მოხსნა და წინასწარ გვემუქრებით, რომ  ქართული პროდუქტი რუსეთში არ გავიდეს...

გასაგებია, რომ საქართველოს ომში ჩართვა და ხელისუფლების შეცვლა გსურთ;

გასაგებია, რომ ამაში დიდ გასამრჯელოს იღებთ და ირგებთ;

გასაგებია, რომ ქართველი ხალხი არ გიყვართ (ჩემი აზრით, არც უკრაინელი);

გასაგებია, რომ როგორც ნიჭიერი მსახიობი, მოცემულ როლს კარგად ასრულებთ;

გასაგებია, რომ ტრაგიკული შედეგის გამო, ბოლომდე გმირის თამაში გაგიჭირდებათ;

გასაგებია, რომ არც თქვენ დაასრულებთ პოლიტიკურ კარიერას პუტინზე უკეთესად;

ახლა, მორიდებით შეგეკითხებით.

როგორც ვხედავ, დრო ბევრი გაქვთ და იქნებ, გვიპასუხოთ:

2008 წელს, როცა რუსი ოკუპანტი ქართულ მიწებს იტაცებდა  და მშვიდობიან მოსახლეობას ბომბავდა,  უკრაინამ თუ შეწყვიტა რუსული პროდუქციის იმპორტი და რუსეთში უკრაინული პროდუქციის ექსპორტი?

სწორი პასუხი: არა.

იქნებ, ჩვენდამი სოლიდარობის ნიშნად, დიპლომატიური ურთიერთობა გაწყვიტეთ რუსეთთან?

სწორი პასუხი: არა.

რაიმე ქმედითი დახმარება თუ აღმოგვიჩინეთ სახელმწიფო დონეზე? იქნებ ჯარი, ან იარაღი გამოგვიგზავნეთ ან უკრაინელი მოხალისეებით გაძეძგილი თვითმფრინავები?

სწორი პასუხი: არა.

იქნებ, რუსეთში თქვენი ბიზნესი შეაჩერეთ ჩვენდამი სოლიდარობის ნიშნად ან იქ აღარ ჩადიოდით?

სწორი პასუხი: არა.

იქნებ, პუტინის და საქართველოს ოკუპაციის მომხრე რუსებს არ უშვებდით უკრაინაში?

სწორი პასუხი: არა.

ახლა, ომის დროს, იღებს თუ არა უკრაინა რუსეთიდან გაზს და იხდის თუ არა მის საფასურს?

სწორი პასუხი: დიახ.

მოუთმენლად ველით თქვენგან სწორი პასუხების დადასტურებას.

პატივისცემით,

რუსულ ოკუპაციასთან და კრიმინალ სააკაშვილის ხელისუფლებასთან მებრძოლი ქართველი ხალხი.

სოლიდარობა უკრაინელ ხალხს!",- აღნიშნულია ელოშვილის ღია წერილში.

სხვა სიახლეები:

📍სიკვდილი განვადებით

📍იტალია - მაფიოზური დაჯგუფების წევრისთვის ჩამორთმეულ ვილაში, უკრაინელი ლტოლვილებისთვის თავშესაფარი გაიხსნა