საქართველოს ნაკრები უნგრეთთან დამარცხდა

ერთა ლიგის მე-5 ტურში საქართველოს საფეხბურთო ნაკრებმა უნგრეთს უმასპინძლა და 0:2 დამარცხდა.

მიხეილ მესხის სახელობის სტადიონზე გამართულ შეხვედრაში საქართველოს ნაკრების მთავარმა მწვრთნელმა, რამაზ სვანაძემ აქამდე გამოცდილი სათამაშო სქემა 4-3-3-ით შეცვალა. ტრავმირებული კვარაცხელიასა და კიტეიშვილის, ასევე დისკვალიფიცირებული ქოჩორაშვილის ნაცვლად, სასტარტო შემადგენლობაში კვერნაძე, გაგნიძე და მექვაბიშვილი დააყენა.

უნგრეთის ნაკრების შემადგენლობასთან დაკავშირებით მთავარი კითხვა სობოსლაის ეხებოდა, რომელსაც ტრავმა აწუხებდა. წინასწარი ვარაუდების მიუხედავად, გუნდის ლიდერი და „ლივერპულის“ ვარსკვლავი სასტარტო თერთმეტეულში მაინც გამოჩნდა.

სვანაძის გუნდმა შეხვედრა აგრესიულად დაიწყო და საწყის წუთებში სტუმრებს არაერთი პრობლემა შეუქმნა. თუმცა, მექვაბიშვილმა და წიტაიშვილმა მიზანს ვერ მიაღწიეს, მიქაუტაძეს კი კართან ბურთი მცველმა აართვა. ლოჩოშვილმა ბურთი კარში გაგზავნა, მაგრამ გოლი თამაშგარის გამო არ ჩაითვალა. კვერნაძემ კი ხელსაყრელი მომენტით ვერ ისარგებლა. უნგრელები ფრთხილად თამაშობდნენ და ძირითადად კონტრშეტევებზე ამყარებდნენ იმედს.

მეორე ტაიმში თამაშის სურათი არ შეცვლილა – საქართველოს ნაკრები ბურთს უფრო მეტად აკონტროლებდა და აქტიურად უტევდა, უნგრელები კი კვლავ კონტრშეტევებზე თამაშობდნენ, რამაც შედეგი მოიტანა – 73-ე წუთზე ლაშა დვალის ავტოგოლით უნგრეთი დაწინაურდა, ხოლო შეხვედრაში საბოლოო ანგარიში 85-ე წუთზე ვარგამ დააფიქსირა.

რამაზ სვანაძის გუნდი ერთა ლიგის დასკვნით შეხვედრას 17 ნოემბერს, სლოვაკეთის ქალაქ კოშიცეში უკრაინასთან გამართავს.