65 წლის ასაკში ევროპარლამენტის პრეზიდენტი დავიდ სასოლი გარდაიცვალა

65 წლის ასაკში გარდაიცვალა ევროპარლამენტის პრეზიდენტი დავიდ სასოლი. ამის შესახებ დღეს დილით ინფორმაცია ტვიტერის მეშვეობით გაავრცელა მისმა პრესმდივანმა რობერტო კუილომ. ,,სასოლი გარდაიცვალა 1.15 წუთზე ავიანოს საავადმყოფოში, სადაც ის მკურნალობის კურსს გადიოდა. დაკრძალვის თარიღის და ადგილის შესახებ ინფორმაცია უახლოეს საათებში გახდება ცნობილი."- წერს კუილო.

ევროპარლამენტარი, წარმოშობით იტალიელი დავიდ სასოლი იმუნური სისტემის დისფუნქციის გართულების გამო 26 დეკემბრიდან იტალიაში, ავიანოს კლინიკაში იმყოფებოდა, სადაც ის გუშინ ღამით გარდაიცვალა. გასულ წელს ევროპარლამენტის პრეზიდენტმა გააუქმა სექტემბრის თვიდან ნოემბრის დასაწყისამდე ყველა შეხვედრა-ლეგიონელას ბაქტერიით გამოწვეული ,,ცუდი" პნევმონიის გამო - როგორც თავად განმარტა გამოჯანმრთელების შემდეგ გამოქვეყნებულ ვიდეოში.

გასული წლის 15 სექტემბერს, იგი სტრასბურგში გადაიყვანეს ,,ცუდი" პნევმონიის დიაგნოზით, ერთ კვირაში კი გამოწერეს და მკურნალობის გასაგრძელებლად  დაუბრუნდა იტალიას. სასოლისთვის მისი გამოჯანმრთელება ხანგრძლივი აღმოჩნდა, იგი დისტანციურად ადევნებდა თვალყურს ევროპარლამენტის შეხვედრებს მთელი ოქტომბრის განმავლობაში. ნოემბრის დასაწყისში განაცხადა პოლიტიკურ ცხოვრებაში დაბრუნების შესახებ და თვის ბოლოს დაბრუნდა კიდეც პლენარულ სხდომაზე თავმჯდომარედ. 

დავიდ სასოლი იყო მეორე იტალიელი პრეზიდენტი ანტონიო ტაიანის შემდეგ. მას შემდეგ, რაც სტრასბურგის ასამბლეამ საყოველთაო კენჭისყრით აირჩიეს, მისი მოქმედების ვადა რამდენიმე დღეში იწურებოდა. იტალიელი, წარმოშობით ფლორენციელი, ჟურნალისტი და ტელეწამყვანი, ,,დემოკრატიული პარტიის" წევრი დავიდ სასოლი ევროპარლამენტის დეპუტატად 2009 წელს აირჩიეს. 2014-2019 წლებში იგი ევროპარლამენტის ვიცე-პრეზიდენტი, ხოლო 2019 წლის ივლისში დავიდ სასოლი ევროპარლამენტის პრეზიდენტად აირჩიეს.

ნონა გედენიძე სპეციალურად ExclusiveTV.ge-სთვის ემილია-რომანიადან

🔵  ევროპარლამენტის პრეზიდენტის გარდაცვალების გამო ირაკლი ღარიბაშვილ მწუხარებას გამოთქვამს