Axios: ტრამპი „მშვიდობის საბჭოს“ დაწყებამდე ისრაელის პრემიერ-მინისტრთან შეხვედრას გეგმავს

აშშ-ის პრეზიდენტი დონალდ ტრამპი და ისრაელის პრემიერ-მინისტრი ბენიამინ ნეთანიაჰუ, შესაძლოა, 18 თებერვალს შეხვდნენ, სანამ ტრამპი „მშვიდობის საბჭოს“ პირველ შეხვედრას მოიწვევს, - ამის შესახებ ინფორმაციას RBC-Ukraine Axios-ზე დაყრდნობით ავრცელებს.

ისრაელის მთავრობის რამდენიმე წყარომ გამოცემას დაუდასტურა, რომ ტრამპი და ნეთანიაჰუ შესაძლოა 18 თებერვალს თეთრ სახლში შეხვდნენ. ისრაელის პრემიერ-მინისტრმა მიიღო ტრამპის შეთავაზება, შეუერთდეს ე.წ. „მშვიდობის საბჭოს“.

„თუ ნეთანიაჰუ მშვიდობის საბჭოს სხდომას დაესწრება, ეს იქნება მისი პირველი საჯარო შეხვედრა არაბ და მუსლიმ ლიდერებთან 7 ოქტომბრის თავდასხმებისა და ღაზას ომის შემდეგ“, - დასძენს გამოცემა.

ამავდროულად, გამოცემის კორესპონდენტის, ბარაკ რავიდის თქმით, განიხილება ირანის საკითხი. ეს უკანასკნელი საკითხი ისრაელისთვის უკიდურესად შემაშფოთებელია.

„ისრაელის პრემიერ-მინისტრი ბენიამინ ნეთანიაჰუ, სავარაუდოდ, ვაშინგტონში შეხვდება აშშ-ის პრეზიდენტ დონალდ ტრამპს და განიხილავს ირანთან მოლაპარაკებებს“, - განაცხადა რავიდმა.

მან დასძინა, რომ ნეთანიაჰუს ოფისის განცხადების თანახმად, განსახილველი საკითხია ის, რომ „ნებისმიერი მოლაპარაკება უნდა მოიცავდეს ირანის ბალისტიკური რაკეტების შეზღუდვას და ირანის ღერძის მხარდაჭერის შეწყვეტას“.

ამავდროულად, თეთრმა სახლმა რავიდს განუცხადა, რომ შეხვედრა ნეთანიაჰუს ინიციატივა იყო.