BBC: ჩინეთში ჩიკუნგუნიას ვირუსის 7000 შემთხვევა დაფიქსირდა

ივლისიდან მოყოლებული ჩინეთის გუანდუნის პროვინციაში კოღოს მიერ გადამდები ვირუსის 7000-ზე მეტი შემთხვევა დაფიქსირდა, რამაც ქვეყანაში Covid-19 პანდემიის დროს არსებული ზომების მსგავსი ზომების მიღება გამოიწვია. ამის შესახებ BBC წერს.

ჩიკუნგუნიას ვირუსით ყველაზე მეტად ქალაქი ფოშანი დაზარალდა, სადაც ინფიცირებულები საავადმყოფოში მკურნალობენ და მათი საწოლები კოღოს ბადეებით არის დაცული. დაავადებულთა გაწერა მხოლოდ ტესტის უარყოფითი პასუხის, ან საავადმყოფოში ერთკვირიანი ყოფნის შემდეგ იქნება შესაძლებელი.

ინფიცირებული კოღოს ნაკბენით გავრცელებული ვირუსი იწვევს ცხელებას და სახსრების ძლიერ ტკივილს, რომელიც ზოგჯერ შეიძლება წლების განმავლობაში გაგრძელდეს, მაგრამ, როგორც წესი, სასიკვდილო არ არის.

რა არის ჩიკუნგუნიას ვირუსი და რა სიმპტომები ახასიათებს მას?

ჩინეთში ჩიკუნგუნიას ვირუსი იშვიათია, ის ხშირია სამხრეთ და სამხრეთ-აღმოსავლეთ აზიასა და აფრიკის ნაწილებში.

დაინფიცირებული კოღოს მიერ ნაკბენი ადამიანების უმეტესობას ჩიკუნგუნიას სიმპტომები სამიდან შვიდ დღემდე უვითარდება.

ცხელებისა და სახსრების ტკივილის გარდა, სხვა სიმპტომებს მიეკუთვნება გამონაყარი, თავის ტკივილი, კუნთების ტკივილი და სახსრების შეშუპება.

შემთხვევათა უმეტესობაში პაციენტები თავს უკეთ ერთ კვირაში იგრძნობენ. თუმცა მძიმე შემთხვევებში სახსრების ტკივილი შეიძლება თვეების, ან წლების განმავლობაშიც კი გაგრძელდეს.

უფრო მძიმე დაავადების რისკის ქვეშ არიან ახალშობილები, ხანდაზმულები და ადამიანები, რომლებსაც აქვთ თანმხლები სამედიცინო პრობლემები, როგორებიცაა გულის დაავადება, ან დიაბეტი.

ჩიკუნგუნიასგან განკურნება არ არსებობს, მაგრამ მისგან გამოწვეული სიკვდილიანობა იშვიათია.

ვირუსი პირველად 1952 წელს ტანზანიაში აღმოაჩინეს. შემდეგ ის საჰარის სამხრეთით მდებარე აფრიკისა და სამხრეთ-აღმოსავლეთ აზიის სხვა ქვეყნებშიც გავრცელდა. დღემდე ის 110-ზე მეტ ქვეყანაშია დაფიქსირებული.

ჯანდაცვის მსოფლიო ორგანიზაციის მონაცემებით, ვირუსის გავრცელების პრევენციის საუკეთესო გზაა იმ წყლის გუბეების შემცირება, რომლებიც კოღოებს გამრავლების საშუალებას აძლევს.