დონალდ ტრამპის განცხადებით, აშშ ირანთან მოლაპარაკებებს დღეს განაახლებს

„ამერიკის შეერთებული შტატების პრეზიდენტი დონალდ ტრამპი აცხადებს, რომ ირანთან მოლაპარაკებების პროცესი დღეს, შუადღის შემდეგ განახლდება“, - ამის შესახებ ინფორმაციას CNN ავრცელებს.

ტრამპის თქმით, ირანული მხარე აცნობიერებდა მოსალოდნელი სამხედრო იერიშის მასშტაბებს, რადგან მზადების პროცესს თვალს ადევნებდა, ახლა კი მხარეები დიალოგის რეჟიმზე გადადიან.

„მათ იცოდნენ, რა მასშტაბის თავდასხმა იგეგმებოდა, რადგან ხედავდნენ, როგორ მიმდინარეობდა მზადება. ახლა კი მათთან მოლაპარაკებების ფორმატში ვსაუბრობთ. ეს შუადღის შემდეგ დაიწყება და ვნახოთ, რა შედეგი იქნება“, – განაცხადა დონალდ ტრამპმა.

პრეზიდენტმა აღნიშნა, რომ დაგეგმილი სამხედრო ოპერაციის შეჩერება ვაშინგტონს რეგიონულმა მოკავშირეებმა - საუდის არაბეთმა, არაბთა გაერთიანებულმა საამიროებმა, კატარმა და უშუალოდ ირანმა სთხოვეს.

„ჩვენ ყველაფერი მზად გვქონდა ოპერაციის დასაწყებად, მაგრამ როდესაც მოკავშირეებმა მისი გაუქმება გვთხოვეს, ვთქვით: „კარგი, ვნახოთ“. მიზეზი, რის გამოც ეს გვთხოვეს, ის არის, რომ მათ მიაჩნიათ, შეთანხმების მიღწევა შესაძლებელია. ჰორმუზის საკითხზე შეთანხმება არსებობს, შემდეგ კი იქნება შეთანხმება ბირთვულ საკითხზე, ან როგორც შეიძლება, ამას ვუწოდოთ, ირანის დენუკლეარიზაციაზე. მე ამას ირანის დენუკლეარიზაციას ვუწოდებ“, - აღნიშნა აშშ-ის პრეზიდენტმა.
მედიის ცნობით, საუდის არაბეთის მემკვიდრე პრინცმა მოჰამედ ბინ სალმანმა ტრამპთან სატელეფონო საუბარი გამართა, რომლის დროსაც აშშ-ის პრეზიდენტს რეგიონში ომის დეესკალაციისკენ მოუწოდა.

თავის მხრივ, ირანის სახელმწიფო მედია უარყოფს ინფორმაციას იმის შესახებ, თითქოს თეირანმა ვაშინგტონს დარტყმების გაუქმება სთხოვა.