ესპანეთმა ჰორმუზის სრუტეში ხომალდების გაგზავნაზე უარი თქვა

ესპანეთი არ მიიღებს მონაწილეობას არანაირ სამხედრო მისიაში ჰორმუზის სრუტეში, რადგან ისრაელ-აშშ-ის ომს ირანის წინააღმდეგ უკანონოდ მიიჩნევს - განაცხადეს ესპანეთის თავდაცვისა და საგარეო საქმეთა მინისტრებმა.

თავდაცვის მარგარიტა რობლესმა უარყო აშშ-ის პრეზიდენტ დონალდ ტრამპის მოთხოვნა სრუტის უსაფრთხოების უზრუნველსაყოფად სამხედრო მხარდაჭერის შესახებ. მან ასევე უპასუხა ტრამპის მუქარას ნატოს მოკავშირეების მიმართ „ძალიან ცუდი მომავლის“ შესახებ.

„ესპანეთი არასოდეს მიიღებს რაიმე სახის დროებით ზომებს, რადგან მთავარი მიზანი ომის დასრულება უნდა იყოს და ის ახლავე უნდა დასრულდეს“, - განაცხადა რობლესმა.

საგარეო საქმეთა მინისტრმა ხოსე მანუელ ალბარესმა აღნიშნა, რომ სრუტეში არსებული ვითარება ევროპელებისთვის სერიოზული შეშფოთების საგანია, თუმცა ევროკავშირის პოზიცია უნდა იყოს ის, რომ ომი ეკონომიკური მოსაზრებების მიუხედავად უნდა შეწყდეს.

„ჩვენ არ უნდა გავაკეთოთ არაფერი, რაც კიდევ უფრო გაზრდის დაძაბულობას ან გამოიწვევს სიტუაციის შემდგომ ესკალაციას“, - განუცხადა მან ჟურნალისტებს ბრიუსელში.

მანამდე უარი ჰორმუზის სრუტეში ხომალდების გაგზავნაზე გერმანიამაც განაცხადა.

მანამდე The Telegraph-ი წერდა, რომ სტარმერმა ტრამპს ჰორმუზის სრუტეში ბრიტანული სამხედრო გემების გაგზავნაზე უარი უთხრა. მანამდე აშშ-ის პრეზიდენტმა აღნიშნა, რომ ნატოს „ძალიან ცუდი“ მომავალი ელის, თუ მოკავშირეები ჰორმუზის სრუტეში ვაშინგტონს არ დაეხმარებიან. დონალდ ტრამპმა ასევე განაცხადა, რომ დაიმახსოვრებს, თუ სხვა ქვეყნები აშშ-ს არ დაეხმარებიან.