ფონ დერ ლაიენი: ევროკავშირი რუსეთის წინააღმდეგ სანქციების ახალ პაკეტს ამზადებს

ევროკომისიის პრეზიდენტმა ურსულა ფონ დერ ლაიენმა განაცხადა, რომ ევროკავშირი რუსეთის წინააღმდეგ სანქციების ახალ პაკეტს ამზადებს.

ევროკომისიის ვებგვერდზე გამოქვეყნებულ განცხადებაში აღნიშნულია, რომ ევროკავშირი მუშაობს ყველა იმ ნაბიჯზე, რომელიც საბოლოოდ სისხლისღვრას დაასრულებს. მდგრადი ცეცხლის შეწყვეტა მშვიდობისკენ გადადგმული პირველი ნაბიჯი უნდა იყოს.

„რუსეთი მუდმივი ზეწოლის ქვეშ უნდა იყოს, რათა მოლაპარაკებების მაგიდასთან დაჯდეს - არა დემონსტრაციისთვის, არამედ შედეგის მისაღწევად. ამ მიზნით, ევროპა გააგრძელებს რუსეთის ომის ხარჯების გაზრდას. ჩვენ ვამზადებთ სანქციების ახალ პაკეტს და დიდი ხნით გავყინეთ რუსული აქტივები ევროკავშირში“, - განაცხადა ფონ დერ ლაიენმა.

მისი თქმით, მშვიდობისკენ გადადგმული მეორე ნაბიჯი უკრაინისთვის საიმედო და დამაჯერებელი უსაფრთხოების გარანტიები უნდა იყოს.

„უსაფრთხოების ეს გარანტიები მყარ პრინციპებს უნდა ეფუძნებოდეს. ჩვენ პატივს ვცემთ გადაწყვეტილებებს, რომლებსაც უკრაინა იღებს საკუთარი თავისთვის. ტერიტორიებთან დაკავშირებული გადაწყვეტილებები მხოლოდ უკრაინამ უნდა მიიღოს. ანალოგიურად, ევროკავშირისა და ნატოს საკითხებს ევროკავშირისა და ნატოს წევრები განიხილავენ. მოკლედ რომ ვთქვათ: არაფერი უკრაინაზე უკრაინის გარეშე. არაფერი ევროკავშირზე ევროკავშირის გარეშე. არაფერი ნატოზე ნატოს გარეშე“, - აღნიშნა ევროკომისიის პრეზიდენტმა.

მესამე პუნქტი უკრაინის ეკონომიკურ აღდგენას ეხება. ფონ დერ ლაიენმა ხაზგასმით აღნიშნა, რომ ევროპა საიმედო პარტნიორად რჩება.

„უკრაინის საჭიროებები უზარმაზარი და გადაუდებელია. ჩვენ უკრაინის აღდგენისა და მომავალი კეთილდღეობის ერთგულები ვართ. ევროპა დარჩება მის ყველაზე ძლიერ და საიმედო პარტნიორად. ჩვენ შევთავაზეთ, რომ მომდევნო ორი წლის განმავლობაში უკრაინის ფინანსური საჭიროებების ორი მესამედი, დაახლოებით 90 მილიარდი ევრო, დავფაროთ. ამიტომ ამ კვირაში ევროპულ საბჭოში განხილვები გადამწყვეტი იქნება“, - დასძინა მან.