ირანი აცხადებს, რომ აშშ-ის თავდასხმის შემთხვევაში, ამერიკელი სამხედროები და ისრაელი თეირანის „ლეგიტიმური სამიზნეები“ იქნებიან

 ირანი შეერთებულ შტატებს აფრთხილებს, რომ თუ ვაშინგტონი თეირანს თავს დაესხმება, ირანი საპასუხო დარტყმას განახორციელებს. ამის შესახებ Associated Press-ი იუწყება.

ირანის პარლამენტის სპიკერმა მუჰამედ ბაქირ კალიბაფმა განაცხადა, რომ აშშ-ის სამხედრო ძალები და ისრაელი „ლეგიტიმური სამიზნეები“ იქნებიან, თუ აშშ ისლამურ რესპუბლიკას დაარტყამს, როგორც პრეზიდენტი დონალდ ტრამპი დაიმუქრა.

კალიბაფმა ეს განცხადება მაშინ გააკეთა, როდესაც კანონმდებლები ირანის პარლამენტის ტრიბუნაზე აიჭრნენ და ყვიროდნენ: „სიკვდილი ამერიკას!“. ირანის სახელმწიფო ტელევიზია პარლამენტის სხდომას პირდაპირ ეთერში გადასცემდა.

კალიბაფმა, მკაცრი ხაზის წარმომადგენელმა, რომელიც წარსულში პრეზიდენტობის კანდიდატი იყო, მადლობა გადაუხადა პოლიციას და ირანის პარამილიტარულ რევოლუციურ გვარდიას საპროტესტო აქციების დროს „მტკიცედ დგომისთვის“. შემდეგ ის პირდაპირ დაემუქრა ამერიკელ სამხედროებს და ისრაელს, რომელსაც მან „ოკუპირებული ტერიტორია“ უწოდა.

„ირანზე თავდასხმის შემთხვევაში, როგორც ოკუპირებული ტერიტორია, ასევე რეგიონში არსებული ყველა ამერიკული სამხედრო ცენტრი, ბაზა და გემი ჩვენი ლეგიტიმური სამიზნე გახდება“, - განაცხადა კალიბაფმა.

„ჩვენ არ ვთვლით თავს შეზღუდულად მხოლოდ მოქმედების შემდეგ რეაგირებით და ვიმოქმედებთ საფრთხის ნებისმიერი ობიექტური ნიშნის საფუძველზე“, - თქვა მან და პრევენციულ დარტყმაზე მიანიშნა.

როგორც სააგენტო AP-ი წერს, გაურკვეველია, რამდენად სერიოზულად უყურებს ირანი დარტყმის განხორციელებას, განსაკუთრებით მას შემდეგ, რაც ივნისში ისრაელთან 12-დღიანი ომის დროს მისი საჰაერო თავდაცვის სისტემები განადგურდა.