იტალიისა და ბელგიის პრემიერ-მინისტრები ევროკავშირის გარე საზღვრების დაცვას ითხოვენ

იტალიისა და ბელგიის პრემიერ-მინისტრებმა ჯორჯია მელონიმ და ბარტ დე ვევერმა ევროკავშირს გარე საზღვრების უფრო ეფექტურად დაცვისკენ და იმიგრაციის პოლიტიკის გამკაცრებისკენ მოუწოდეს. ამის შესახებ მათ რომში ერთობლივ პრესკონფერენციაზე განაცხადეს.

დე ვევერმა და მელონიმ ხაზი გაუსვეს ხმელთაშუა ზღვის გასწვრივ ევროკავშირის სამხრეთ საზღვრების განმტკიცების აუცილებლობას.

„აბსოლუტურად მესმის, რომ ჩვენ გვჭირდება ევროპის სამხრეთი საზღვრის განმტკიცება. ჩვენ ბევრს ვსაუბრობთ აღმოსავლეთ საზღვარსა და იქ არსებულ საფრთხეებზე, მაგრამ არ უნდა დავივიწყოთ, რომ გვაქვს სამხრეთ საზღვარიც - საზღვარი ხმელთაშუა ზღვის გასწვრივ. ევროპამ უნდა აიღოს პასუხისმგებლობა ამ საზღვრის დახურვაზე“, - განაცხადა ბელგიის პრემიერ-მინისტრმა.

დე ვევერი მელონის მას შემდეგ შეხვდა, რაც ივლისის ბოლოს მაროკოდან ათიათასობით მიგრანტიი ესპანეთის ავტონომიურ ქალაქ სეუტაში შეიჭრა. იტალიამ ესპანეთიდან ჩასული მოგზაურებისთვის დაუყოვნებლივ დააწესა სასაზღვრო კონტროლი, რომელიც გასულ კვირას კიდევ თხუთმეტი დღით გაგრძელდა.

იტალიის პრემიერ-მინისტრმა ასევე მოუწოდა ევროკავშირს გარე საზღვრების უფრო ეფექტური დაცვისკენ.

„კვლავინდებურად მტკიცედ ვარ დარწმუნებული, რომ შენგენის ზონის შენარჩუნება მხოლოდ იმ შემთხვევაში იქნება შესაძლებელი, თუ კავშირის გარე საზღვრები დაცული იქნება და თუ ყველა შეიტანს წვლილს მიგრანტების უკანონო გადამყვანების წინააღმდეგ ბრძოლაში“, - განაცხადა მელონიმ.

მელონისთან შეხვედრის დროს დე ვევერმა მხარი დაუჭირა ევროპული მიგრაციის ახალი პაქტის ყველა ასპექტის სრულ განხორციელებას, მათ შორის დაბრუნების უფრო მკაცრი პოლიტიკის გატარებას.

„მხოლოდ დაბრუნების საიმედო პოლიტიკის წყალობით შეგვიძლია ევროპული მიგრაციის პოლიტიკის წარმატებას მივაღწიოთ“, - განაცხადა ბელგიის პრემიერ-მინისტრმა.