რუსეთის საგარეო უწყება აცხადებს, რომ სანქტ-პეტერბურგში გერმანიის გენერალური საკონსულოს მუშაობას აჩერებს

მოსკოვი აჩერებს გერმანიის გენერალური საკონსულოს მუშაობას სანქტ-პეტერბურგში და გოეთეს სახელობის კულტურის ცენტრების საქმიანობას რუსეთში. ეს ნაბიჯი ბერლინის არამეგობრული ქმედებების საპასუხოდ გადაიდგა, რაც ბონში რუსეთის გენერალური საკონსულოსა და გერმანიის დედაქალაქში რუსული მეცნიერებისა და კულტურის სახლის („რუსული სახლის“) დახურვას უკავშირდება, ნათქვამია რუსეთის საგარეო საქმეთა სამინისტროს განცხადებაში.

„რუსული მხარე აუქმებს თანხმობას სანქტ-პეტერბურგში გერმანიის ფედერაციული რესპუბლიკის გენერალური საკონსულოს ფუნქციონირებაზე, რომელმაც უნდა შეწყვიტოს თავისი საქმიანობა არაუგვიანეს 2026 წლის 18 სექტემბრისა, ხოლო მისმა ყველა თანამშრომელმა აღნიშნულ თარიღამდე უნდა დატოვოს რუსეთის ფედერაცია“, - ნათქვამია რუსეთის საგარეო უწყების განცხადებაში.

„რუსეთის ფედერაციაში არსებულმა გერმანულმა გოეთეს სახელობის კულტურულმა ცენტრებმა უნდა შეწყვიტონ ფუნქციონირება. მათ თანამშრომლებს, რომლებიც მივლინებაში იმყოფებიან, ევალებათ რუსეთის დატოვება არაუგვიანეს 2026 წლის 13 სექტემბრისა“, - აღნიშნულია განცხადებაში.

როგორც უწყებაში განმარტეს, დიპლომატიური მისიის ხელმძღვანელს - გერმანიის ფედერაციული რესპუბლიკის საქმეთა დროებით რწმუნებულს - რუსეთის საგარეო საქმეთა სამინისტროს შესაბამისი ნოტები გადაეცა.

„აღინიშნა, რომ სწორედ გერმანიის ხელისუფლებამ გამოიწვია ორმხრივ ურთიერთობებში ესკალაციის ახალი რაუნდი. შედეგებზე მთელი პასუხისმგებლობა გერმანიის მთავრობას ეკისრება“, - ნათქვამია რუსეთის საგარეო საქმეთა სამინისტროს განცხადებაში.