კაია კალასი: აშშ-ს, ჩინეთსა და რუსეთს გახლეჩილი ევროპა ურჩევნიათ

ტრამპის ადმინისტრაციას არ მოსწონს ერთიანი ევროკავშირი, რადგან ეს ბლოკი არის გეოპოლიტიკური ძალა, რომლისთვისაც ვაშინგტონს ანგარიშის გაწევა უწევს, - განაცხადა ევროკავშირის საგარეო პოლიტიკის ხელმძღვანელმა, კაია კალასმა. მან ევროკავშირის წევრ ქვეყნებს მოუწოდა, არ დაასუსტონ ბლოკი აშშ-სთან ორმხრივი შეთანხმებების გაფორმებით.

„მათ არ მოსწონთ ევროკავშირი, ეს სრულიად ნათელი. მაგრამ ჩვენ უნდა გვესმოდეს, რატომ არ მოსწონთ მათ ევროკავშირი; რატომ არ მოსწონს ჩინეთს, რატომ არ მოსწონს რუსეთს. ეს იმიტომ ხდება, რომ თუ ჩვენ ერთად ვიქნებით, თუ ერთობლივად ვიმოქმედებთ, მაშინ ჩვენ ვართ თანაბარი ძალის მქონე და ძლიერები“, - თქვა კალასმა კვირას, ტალინში გამართულ ლენარტ მერის კონფერენციაზე.

კალასის თქმით, ბევრად „უფრო ადვილია“ ურთიერთობა ცალკეულ ქვეყნებთან, რომლებიც გაცილებით მცირე ზომის არიან, ვიდრე ბლოკთან, რომელსაც შეუძლია იმოქმედოს როგორც თანასწორმა ძალამ. მისი განცხადებით, ისეთი რიტორიკა, როგორიცაა: „თქვენთან შესანიშნავი ურთიერთობა მაქვს, მაგრამ ევროკავშირი არ მომწონს“, არის „გათიშე და იბატონეს“ სტრატეგიის ნაწილი.

„ძალიან ვნერვიულობ, რადგან ხანდახან ვხედავ, რომ ზოგიერთი ქვეყანა ამ გზას ადგება. ეს დაყოფა რეალურად მუშაობს“, - დასძინა მან.