ნეთანიაჰუმ ტრამპის „მშვიდობის საბჭოს“ გეგმა უარყო - ისრაელი ღაზიდან ჯარის გაყვანას არ აპირებს

„ისრაელის პრემიერ-მინისტრმა ბენიამინ ნეთანიაჰუმ, მთავრობის სხდომაზე ღაზის სექტორის მომავალთან დაკავშირებით დონალდ ტრამპის მიერ შემუშავებული 15-პუნქტიანი „მშვიდობის საბჭოს“ გეგმა უარყო“, - ამის შესახებ Reuters-ი იუწყება.

ნეთანიაჰუს თქმით, ისრაელელი სამხედროები პალესტინის ტერიტორიიდან მანამ არ გავლენ, სანამ დაჯგუფება „ჰამასი“ სრულად არ განიარაღდება.

მან ასევე ხაზგასმით აღნიშნა, რომ მისი პრემიერ-მინისტრობის პერიოდში ღაზის სექტორში ან მდინარე იორდანეს დასავლეთ სანაპიროზე პალესტინის სახელმწიფო ვერ შეიქმნება.

აღნიშნული განცხადება ეწინააღმდეგება აშშ-ის პრეზიდენტის მიერ გასულ თვეში გაკეთებულ განცხადებას, რომლის თანახმადაც, გასულ წელს ისრაელსა და „ჰამასს“ შორის შეთანხმებული სამშვიდობო გეგმა წარმატებით ხორციელდებოდა.

მედიის ცნობით, სამშვიდობო შეთანხმების მიუხედავად, ისრაელის არმია ღაზის სექტორზე სამხედრო იერიშებს განაგრძობს.

ცნობისთვის, დონალდ ტრამპის გეგმა ღაზაში ომის დასრულებას, ცეცხლის შეწყვეტას, „ჰამასის“ განიარაღებასა და მის მმართველობიდან ჩამოშორებას ითვალისწინებდა. ამასთან, გეგმის მიხედვით, ყველა მძევლის გათავისუფლების სანაცვლოდ ისრაელს პალესტინელი პატიმრები უნდა გაეთავისუფლებინა, ისრაელის არმიას კი ეტაპობრივად დაეტოვებინა ღაზის ტერიტორია. ინიციატივის საბოლოო მიზანს ღაზის დემილიტარიზაცია, რეკონსტრუქცია და ეკონომიკური აღდგენა წარმოადგენდა.