ნიკოლ ფაშინიანი: ადრე თანამშრომლობის 85-90% ერთ ქვეყანასთან თუ ხდებოდა, ახლა ჩვენ ვავითარებთ ურთიერთობებს საქართველოსთან, ჩინეთთან, საფრანგეთთან, ნიდერლანდებთან და სხვა ქვეყნებთან

საგარეო პოლიტიკის ვექტორებისა და კავშირების დივერსიფიკაცია სომხეთის რებალანსირების პოლიტიკის ძირითადი ელემენტებია, – ამის შესახებ სომხეთის პრემიერ-მინისტრმა ნიკოლ ფაშინიანმა განაცხადა.

კითხვაზე, რომელიც შეეხებოდა ინტეგრაციულ პროცესებს, ევროპულ ინტეგრაციაზე ევრაზიის ეკონომიკური კავშირის წევრი ქვეყნების პოზიციებს, ნიკოლ ფაშინიანმა უპასუხა, რომ პარტნიორების განცხადებები ულტიმატუმებად არ უნდა იყოს აღქმული.

„ევრაზიის ეკონომიკური კავშირის ქვეყნების ლიდერების განცხადება, რომლითაც ისინი მხარს უჭერენ რეფერენდუმის ჩატარების იდეას, არ არის მოთხოვნა, არამედ მეგობრული ჟესტი. ის აზრი, რომ რეფერენდუმი გარკვეულ მომენტში აუცილებელია, ჩვენ გვეკუთვნის. მოხარული ვართ, რომ ჩვენი პარტნიორები იზიარებენ ამ პოზიციას და არ ეწინააღმდეგებიან სომხეთის ევროპულ დღის წესრიგს. საერთაშორისო ურთიერთობებში სახელმწიფოები მუდმივად გამოხატავენ თავიანთ ინტერესებს და ეს ნორმალური პროცესია“, – აღნიშნა სომხეთის პრემიერ-მინისტრმა.

ფაშინიანის განცხადებით, ამჟამინდელ კურსსა და წინა პოლიტიკას შორის მთავარი განსხვავება მონომიმართულებიანი მიდგომის სრულფასოვანი მრავალვექტორიანი თანამშრომლობით ჩანაცვლებაა.

„ადრე ჩვენ მხოლოდ ერთი მიმართულებით გვქონდა სტრატეგიული თანამშრომლობა. დღეს ჩვენ ვაშენებთ და ვავითარებთ ურთიერთობებს საქართველოსთან, ჩინეთთან, საფრანგეთთან, ნიდერლანდებთან, ყაზახეთთან და სხვა ქვეყნებთან. ეს დაბალანსების აქტი ასევე აშკარაა სამხედრო-ტექნიკურ სფეროში: ადრე თანამშრომლობის 85-90% თუ ერთ ქვეყანასთან ხდებოდა, ახლა ჩვენ ათობით პარტნიორთან ვთანამშრომლობთ. მაისის აღლუმზე წარმოდგენილი იყო აღჭურვილობა და იარაღი შვიდი სხვადასხვა ქვეყნიდან, რაც აშკარად ასახავს ამ დივერსიფიკაციას“, – აღნიშნა ნიკოლ ფაშინიანმა.