დონალდ ტრამპი: ვაცხადებ ყველაზე გამანადგურებელ ეკონომიკურ ოპერაციას ირანის წინააღმდეგ, ეს იქნება ეკონომიკური ომი და იზოლაცია უპრეცედენტო მასშტაბით

აშშ-ის პრეზიდენტი დონალდ ტრამპი ირანის ისლამური რესპუბლიკის წინააღმდეგ უპრეცედენტო მასშტაბის ეკონომიკური ომისა და სრული იზოლაციის დაწყებას აანონსებს. ამის შესახებ ამერიკის ლიდერი Truth Social-ის საკუთარ გვერდზე წერს.

მისი თქმით, თეირანმა ხელიდან გაუშვა შეთანხმების მიღწევის ისტორიული შანსი, რის გამოც ვაშინგტონი ეკონომიკურ ბლოკადას იწყებს.

„არავის მიუცია ირანის ისლამური რესპუბლიკისთვის შეთანხმების დადების უფრო დიდი შესაძლებლობა, ვიდრე მე. სამწუხაროდ, მათ ეს ვერ შეძლეს. ამიტომ, დღეს ვაცხადებ ყველაზე გამანადგურებელ ეკონომიკურ ოპერაციას, რაც კი ოდესმე განხორციელებულა რომელიმე ქვეყნის წინააღმდეგ! ეს იქნება ეკონომიკური ომი და იზოლაცია უპრეცედენტო მასშტაბით“, – წერს ტრამპი.

აშშ-ის პრეზიდენტის განცხადებით, ირანის სამხედრო და ფინანსური რესურსები პრაქტიკულად განადგურებულია.

„მათი საზღვაო ძალები აღარ არსებობს, საჰაერო ძალები განადგურებულია, სამხედრო ქარხნები ნანგრევებადაა ქცეული, ვალუტა გაუფასურებულია, ხოლო მათი ქვეყანა ბეწვის ხიდზე დგას“, - დასძინა პრეზიდენტმა.

დონალდ ტრამპმა აღნიშნა, რომ სანქციები და უმძიმესი ეკონომიკური შედეგები გავრცელდება ნებისმიერ ქვეყანაზე, რომელიც ირანს რაიმე სახის დახმარებას გაუწევს.

„დღეს ასევე ვაცხადებ, რომ ნებისმიერი ქვეყანა, რომელიც საკუთარ ფინანსურ ინსტიტუტებს, ბიზნესებს, აეროპორტებს ან სამთავრობო უწყებებს ირანისთვის რაიმე სახის დახმარების გაწევის საშუალებას მისცემს, თავადაც უმძიმესი ეკონომიკური შედეგების წინაშე აღმოჩნდება. ნავთობის კონტრაბანდა, ფინანსური სქემები, ნაღდი ფულის გადარიცხვები, ვალუტის გადამცვლელი პუნქტები, გემების რეგისტრაცია, ფიქტიური კომპანიები – ეს ყველაფერი ახლავე უნდა შეწყდეს. თქვენ იცით, ვისაც ვგულისხმობ. ეს იქნება ირანის წინააღმდეგ უპრეცედენტო ეკონომიკური შეტევის დასაწყისი და ჩვენ გვჭირდება ყველა ჩვენი მოკავშირის მხარდაჭერა, რათა ამერიკის შეერთებულ შტატებთან ერთად მოვახდინოთ ირანის იზოლაცია და დავამარცხოთ ირანის საფრთხე. ეს შეშლილები კუთხეში არიან მიმწყვდეული და ეს ისტორიული ზომები მნიშვნელოვნად დაასუსტებს მათ შესაძლებლობას, ტერორის გავრცელება მთელ მსოფლიოში განაგრძონ. ირანს არასოდეს ექნება ბირთვული იარაღი“, – განაცხადა დონალდ ტრამპმა.