ორბანის ოფისი აცხადებს, რომ უნგრეთი ჯანდაცვის მსოფლიო ორგანიზაციიდან გასვლას განიხილავს

 უნგრეთის პრემიერ-მინისტრის ვიქტორ ორბანის ოფისმა განაცხადა, რომ უნგრეთი განიხილავს ჯანდაცვის მსოფლიო ორგანიზაციის დატოვებას შეერთებული შტატების ანალოგიური გადაწყვეტილების შემდეგ. ამის შესახებ უნგრეთის პრემიერ-მინისტრის აპარატის ხელმძღვანელმა გერგელი გულიასმა ჟურნალისტებს განუცხადა, იუწყება Politico.

„თუ მსოფლიოს ყველაზე ძლიერი ქვეყანა გადაწყვეტს, დატოვოს საერთაშორისო ორგანიზაცია, მაშინ, ვფიქრობ, უნგრეთის მთავრობამ ფრთხილად უნდა იმოქმედოს, თუკი განიხილავს, გადადგას თუ არა ეს ნაბიჯი

შეიძლება მივიდეთ დასკვნამდე, რომ ეს არ უნდა გავაკეთოთ, შეიძლება სხვა გადაწყვეტილება მივიღოთ, რა თქმა უნდა, მაგრამ ნამდვილად ღირს ამის განხილვა“, - აღნიშნა გულიასმა.

ცნობისთვის, მას შემდეგ, რაც დონალდ ტრამპის განკარგულებით შეერთებულმა შტატებმა ჯანდაცვის მსოფლიო ორგანიზაცია დატოვა, მსგავსი ნაბიჯის გადადგმის შესახებ არგენტინის ხელისუფლებამაც განაცხადა.

„[არგენტინის] პრეზიდენტმა [ხავიერ] მილეიმ [საგარეო საქმეთა მინისტრ] ხერარდო ვერტეინს დაავალა, შეწყვიტოს არგენტინის მონაწილეობა ჯანდაცვის მსოფლიო ორგანიზაციაში. ჩვენ, არგენტინელები, არ მივცემთ უფლებას საერთაშორისო ორგანიზაციას, ჩაერიოს ჩვენს სუვერენიტეტში, მით უმეტეს ჩვენს ჯანდაცვაში“ - განაცხადა პრეზიდენტის სპიკერმა მანუელ ადორნიმ 5 თებერვალს გამართულ პრესკონფერენციაზე, იუწყება CNN.