ზელენსკი: ტყუილია, რომ უკრაინაში უფრო მეტი კორუფციაა, ვიდრე ევროპის სხვა სახელმწიფოებში

ტყუილია, რომ უკრაინაში უფრო მეტი კორუფციაა, ვიდრე ევროპის სხვა სახელმწიფოებში - ჩვენთან არის კორუფცია, მაგრამ ჩვენ მას ვებრძვით და ყოჩაღები ვართ, - განაცხადა უკრაინის პრეზიდენტმა, ვოლოდიმირ ზელენსკიმ. ინფორმაციას ამის შესახებ უკრაინული მედია ავრცელებს.

პრეზიდენტმა BBC-სთან ინტერვიუში აღნიშნა, რომ ქვეყანაში კორუფციის შემთხვევები არსებობს, თუმცა ხელისუფლება მათ ებრძვის და ანტიკორუფციულ ინფრასტრუქტურას ავითარებს.

„ჩვენ კარგად გვესმის: არსებობს ბევრი სხვადასხვა რეიტინგი, რომლებიც სხვადასხვანაირად იზომება. არსებობს ბევრი სხვადასხვა შემთხვევა და ყველა ადეკვატურ ადამიანს მკაფიოდ ესმის, რომ ჩვენ გვაქვს ასეთი პრობლემა. დიახ, ამ ქვეყანაში არის კორუფცია და მას აჩვენებენ. ის არსებობს. მაგრამ ის არის ყველა ევროპულ ქვეყანაში, მოდით, ვიყოთ გულწრფელები. უბრალოდ, მე მინდა, რომ ჩვენ ვაღიარებდეთ ჩვენს სუსტ წერტილებს - და ეს ჩვენი ერთ-ერთი სუსტი წერტილია - მაგრამ ამავდროულად არ ვკარგავდეთ ერთიანობას, პატივს ვცემდეთ უკრაინას და არ ვამბობდეთ, რომ ეს მხოლოდ ჩვენთან ხდება და სხვებთან - არა“, - განაცხადა ზელენსკიმ.

მისი თქმით, უკრაინა იმით გამოირჩევა, რომ პრობლემებს არ მალავს. ზელენსკიმ დასძინა, რომ რუსეთი კორუფციის თემას განავითარებს, რათა უკრაინაზე ზეწოლა მოახდინოს და საზოგადოება გახლიჩოს.