მიხეილ სარჯველაძე: ბინადრობის არმქონე უცხოელის დასაქმება განიხილება როგორც უნებართვო საქმიანობა და შეიძლება, ისჯებოდეს დაწყებული ადმინისტრაციულ-სამართლებრივი, დამთავრებული სისხლის სამართლებრივი პასუხისმგებლობითაც

ბინადრობის არმქონე უცხოელის დასაქმება განიხილება როგორც უნებართვო საქმიანობა და შეიძლება, ისჯებოდეს დაწყებული ადმინისტრაციულ-სამართლებრივი პასუხისმგებლობით, დამთავრებული სისხლის სამართლებრივი პასუხისმგებლობითაც, - განაცხადა გადაცემაში „დღის ქრონიკა“ ჯანდაცვის მინისტრმა მიხეილ სარჯველაძემ.

მან ისაუბრა ბინადრობის არმქონე უცხოელის დასაქმების შემთხვევაში, როგორ მოხდება ამ დარღვევის გამოვლენა და პროცედურულად როგორ განვითარდება.

მისივე თქმით, მუშაობს სისტემა, რომლითაც მოხდება გამოვლენა და შემდეგ შესაბამისი სამართლებრივი პასუხისმგებლობის დაკისრება. მინისტრმა აღნიშნა, რომ ეს ერთ-ერთი გამოწვევაა და ყურადსაღები ფაქტია, რათა ამ ყველაფერს ჩრდილოვანი სახე არ მიეცეს.

„ბუნებრივია, ამისთვის ვართ მზად და შესაბამისად, გავაგრძელებთ, რომ მუდმივად უმჯობესდებოდეს მზადყოფნის დონე. რა თქმა უნდა, ეს სააგენტოსთვის მნიშვნელოვანი მიმართულება იქნება, მაგრამ არა მხოლოდ ჩვენი დასაქმების სააგენტოსთვის, ეს იქნება მთლიანად სახელმწიფო პოლიტიკის ნაწილი და ამას ყურადღებით დააკვირდება იგივე შემოსავლების სამსახური და ნებისმიერი სხვა დაწესებულება, რომელიც ამაში ჩართულია.

რაც შეეხება გამოვლენის შემდგომ - თუ ასეთ ფაქტს ადგილი ექნება, ბუნებრივია, ეს განიხილება როგორც უნებართვო საქმიანობა. რა შედეგები მოჰყვება ამას? - დაწყებული ადმინისტრაციულ-სამართლებრივი პასუხისმგებლობით, დამთავრებული სისხლის სამართლებრივი პასუხისმგებლობითაც, შეიძლება ეს ისჯებოდეს, დამოკიდებულია კონკრეტული სამართალდარღვევის კომპონენტებზე“, - აღნიშნა მინისტრმა.

სარჯველაძის თქმით, მობილიზებული იქნებიან, რომ „რაიმე არ იყოს ისეთი, რამაც შეიძლება მანკიერად პროცესების განვითარება გამოიწვიოს“.

„ამ გადაწყვეტილების მიღმა ჩვენ არ გვჭირდება ჩრდილოვანი დასაქმების შემთხვევები. ამიტომ, ბუნებრივია, ყველანაირი რესურსი იქნება მობილიზებული, რომ არც ერთი ასეთი შემთხვევა არ დარჩეს სამართლებრივი რეაგირების გარეშე. თვითმიზანი არ გახლავთ ვინმეს დასჯა. მთავარი ამოცანაა, რომ ასეთი რამ არ ხდებოდეს. ამის პრევენცია ყველაზე მეტად მნიშვნელოვანია“, - განაცხადა მინისტრმა.

ირაკლი კობახიძის განკარგულებით, პირველი მარტიდან მუდმივი ბინადრობის არმქონე უცხო ქვეყნის მოქალაქეებს კურიერებად, ტაქსის მძღოლებად და გიდებად მუშაობა აეკრძალებათ.