23 ივლისიდან გამოცდებში მაგისტრანტობის კანდიდატები ჩაერთნენ

დღეს, 23 ივლისს მაგისტრანტობის კანდიდატებისთვის ორ სესიად ჩატარდა საერთო სამაგისტრო გამოცდა წაკითხულის გააზრებისა და ანალიტიკური წერის ნაწილებში. ინფორმაციას შეფასებისა და გამოცდების ეროვნული ცენტრი ავრცელებს.

ხვალ, 24 ივლისს კი აპლიკანტები გამოცდას ლოგიკური მსჯელობისა და რაოდენობრივი მსჯელობის ნაწილებში ჩააბარებენ.

პროცესის მიმდინარეობას ქუთაისის N41 და N17 საჯარო სკოლებში გახსნილ საგამოცდო ცენტრებში შეფასებისა და გამოცდების ეროვნული ცენტრის დირექტორი თამარ მემანიშვილი აკვირდებოდა.

პირველ და მეორე სესიაზე განაწილებულთაგან დღეს გამოცდაზე გამოცხადდა 84%-მდე მაგისტრანტობის კანდიდატი.

საერთო სამაგისტრო გამოცდის ჩაბარების სურვილი წელს 10 000-ზე მეტმა პირმა გამოთქვა.

გამოსაცდელთა საყურადღებოდ:

სამაგისტრო პროგრამებზე სწავლის გაგრძელების აუცილებელი პირობაა საერთო სამაგისტრო გამოცდასთან ერთად უმაღლესი საგანმანათლებლო დაწესებულების მიერ დანიშნული გამოცდის/გამოცდების (სპეციალობაში, უცხოურ ენაში და სხვ.) ჩაბარება. საერთო სამაგისტრო გამოცდის ჩატარებაზე პასუხისმგებელია შეფასებისა და გამოცდების ეროვნული ცენტრი, ხოლო შიდა გამოცდის ჩასაბარებლად მსურველებმა უნდა მიმართონ შესაბამის უმაღლეს საგანმანათლებლო დაწესებულებას.

გაითვალისწინეთ, რომ თუ გამოცდებში მონაწილე ოთხი ნაწილიდან სამში ზღვარს გადალახავს, საერთო სამაგისტრო გამოცდა წარმატებით ჩაბარებულად ჩაეთვლება (თუ გამონაკლისის სახით რომელიმე პროგრამა არ ითხოვს ოთხივე ნაწილში შესაბამისი ქულის მიღებას).

საერთო სამაგისტრო გამოცდების პარალელურად მიმდინარეობს გამოცდები მასწავლებლებისა და მასწავლებლობის მსურველებისათვის - ბოლო გამოცდა 29 ივლისს სახვით და გამოყენებით ხელოვნებაში ჩატარდება.