არჩილ გორდულაძე: შევიტანეთ სარჩელი BBC-ში, თუ არ დაკმაყოფილდება, განხილვა გაგრძელდება იქაურ კომუნიკაციების ბიუროში, თუ არც იქ დაკმაყოფილდება, სასამართლოში - ვიტოვებთ უფლებას, სტრასბურგის სასამართლოშიც გავასაჩივროთ

შევიტანეთ სარჩელი BBC-ში, თუ არ დაკმაყოფილდება, განხილვა გაგრძელდება იქაურ კომუნიკაციების ბიუროში, თუ არც იქ დაკმაყოფილდება, სასამართლოში. შემდეგ ვიტოვებთ იმის უფლებას, სტრასბურგის სასამართლოშიც გავასაჩივროთ, - განაცხადა იურიდიულ საკითხთა საპარლამენტო კომიტეტის თავმჯდომარემ არჩილ გორდულაძემ „დღის ქრონიკაში“.

დეპუტატი „ქართული ოცნების“ მიერ BBC-ის წინააღმდეგ საჩივარს ეხმაურება.

„ეს არის ტყუილების კასკადი, რომელიც ვიხილეთ BBC-ის ფილმში. არ არსებობს სტანდარტი, რომელიც BBC-მ არ დაარღვია. უნდოდათ, შეექმნათ მოცემულობა, რომელზეც შემდეგ პოლიტიკური ინსინუაციები და საქართველოზე დარტყმა იქნებოდა. კრიტიკას ვერ უძლებს ეს ზღვა ტყუილები. საკითხი ეყრდნობა ჩახუნაშვილის, ბაჩიაშვილის და სხვა პირების მოსაზრებებს. უნდოდათ, შექმნილიყო აღქმა, თითქოს საქართველოში გამოიყენეს „კამიტი“. არ მესმის, როგორ შეიძლება, არსებობდეს საქართველოში მოქალაქე, რომელიც როდესაც იგებს, რომ ხელისუფლებას აბრალებენ ასეთ უმძიმეს დანაშაულს, ელემენტარულად აღშფოთებასაც არ გამოხატავს, ეთანხმება და ახსენდება, რომ ერთი წლის წინ მის თუთიყუშს ბუმბული დასცვენია და ძაღლი გაბრაზებია პატრონს. ეს იარაღი რომ გამოეყენებინათ საქართველოში, მერწმუნეთ, ბევრი ფატალური შედეგი დადგებოდა.

აუცილებელია, საერთაშორისო დონეზეც დადასტურდეს BBC-ის ტყუილები, როგორც, მაგალითად, „რუსთავი 2“-ის საქმეში, მელიას საქმეში და გვარამიას საქმეში დადასტურდა ქართული სახელმწიფოს უდანაშაულობა. ყველანაირი მექანიზმი უნდა ვცადოთ, რომ ჩვენი სიმართლე დავამტკიცოთ სამართლებრივადაც, გამომდინარე იქიდან, რომ არსებობს შესაბამისი პროცედურა. შევიტანეთ სარჩელი BBC-ში, თუ არ დაკმაყოფილდება, განხილვა გაგრძელდება იქაურ კომუნიკაციების ბიუროში, თუ არც იქ დაკმაყოფილდება, სასამართლოში. შემდეგ ვიტოვებთ იმის უფლებას, სტრასბურგის სასამართლოშიც გავასაჩივროთ. ყველა ღონეს გამოვიყენებთ, რომ ჩვენი სიმართლის ხმა ისმოდეს ყველა პლატფორმაზე“, - აღნიშნა გორდულაძემ.