გიორგი დოლიძე: 2025 წელმა ტურიზმის ინდუსტრიაში ყველანაირ მოლოდინს გადააჭარბა

„2025-მა წელმა ტურიზმის ინდუსტრიაში ყველანაირ მოლოდინს გადააჭარბა, რაც ძალიან დამაჯერებელი და დამაიმედებელია კერძო სექტორისთვის. ყველანაირ ისტორიულ მაქსიმუმს გადავაჭარბეთ, რაც კი აქამდე გვქონია. შეგვიძლია ვთქვათ, რომ კოვიდ პანდემიამდე პერიოდი ფაქტობრივად, სრულად არის აღდგენილი, როგორც ვიზიტების, ასევე, შემოსავლების მიმართულებით“, - აცხადებს HSC Group Hospitality-ს დამფუძნებელი გიორგი დოლიძე და საქართველოში ტურისტული ნაკადის რეკორდული მაჩვენებლის დაფიქსირებას ტურიზმის ეროვნული დეპარტამენტის შრომის შედეგს უწოდებს.

„სტრატეგიული ნაბიჯები გადაიდგა სახელმწიფოს მხრიდან 2025 წელს, როგორიცაა ფრენების დამატება ჩვენთვის მნიშვნელოვანი მიმართულებებიდან: დიდი ბრიტანეთი, ევროპა, აზიის და არაბეთის ქვეყნები, ინდოეთისა და ჩინეთის მიმართულება, რამაც დადებითი შედეგი იქონია და ტურისტული ნაკადის ზრდა გამოიწვია.
ასევე, ხაზგასასმელია, რომ იმ ლოკაციებზე, საიდანაც დაემატა ფრენები, მიზანმიმართული მარკეტინგული კამპანიები დაიგეგმა. მნიშვნელოვანი ფაქტორი იყო კერძო სექტორის აქტიურობა საერთაშორისო ტურისტულ გამოფენებზეც, სადაც ცდილობდნენ ბაზრების დივერსიფიკაციას და ახალი პარტნიორების მოძიებას.

ვფიქრობთ, 2026 წელს საშუალო დატვირთულობას 85%-ს მივაღწევთ. ასე რომ, დამაიმედებლად ვუყურებთ აღნიშნულ სექტორში ბიზნესის განვითარებას. ვფიქრობ, 6 მილიონსაც გადააჭარბებს საქართველოში ტურისტების რაოდენობა და შემოსავალიც შესაბამისად, 2025 წელთან შედარებით, 10%-ით გაიზრდება“, - აღნიშნავს გიორგი დოლიძე.