დავით სონღულაშვილი UNDP-ის წარმომადგენელს და კორეელ საერთაშორისო ექსპერტს შეხვდა

გარემოს დაცვისა და სოფლის მეურნეობის მინისტრი დავით სონღულაშვილი გაეროს განვითარების პროგრამა UNDP-ის გარემოს დაცვისა და ენერგეტიკის მიმართულების ხელმძღვანელს ნინო ანთაძეს და საერთაშორისო ექსპერტს ქუანგ-იანგ კიმს შეხვდა.

კორეელმა საერთაშორისო ექსპერტმა ქუანგ-იანგ კიმმა, ქართულ მხარესთან პარტნიორობით, სეულის ეროვნული უნივერსიტეტის წარმომადგენლებთან ერთად აპლიკაცია Georgia Climate Services for Agriculture (GECSA) შექმნა. აპლიკაცია GECSA ფერმერებსა და აგრარული სფეროს წარმომადგენლებს კლიმატური რისკების, მათ შორის მავნებლებისა და დაავადებების შესახებ დროული და სანდო ინფორმაციის მიღების შესაძლებლობას აძლევს. ამჟამად, აპლიკაცია პილოტირების რეჟიმშია და კახეთის, შიდა ქართლის ასევე, ნაწილობრივ ქვემო ქართლის რეგიონს ფარავს.

შეხვედრაზე დავით სონღულაშვილმა მადლობა გადაუხადა UNDP-ისა და საერთაშორისო ექსპერტს მხარდაჭერისთვის და ხაზი გაუსვა, დარგში ციფრული სერვისების დანერგვის და განვითარების მნიშვნელობას. მინისტრმა კლიმატური ცვლილებების ფონზე აგროსექტორის წინაშე არსებულ გამოწვევებზეც ისაუბრა.

ნინო ანთაძემ სამინისტროს მრავალწლიანი ნაყოფიერი თანამშრომლობისთვის მადლობა გადაუხადა და აღნიშნა, რომ აგრარული დარგის განვითარების ხელშეწყობისთვის, მნიშვნელოვანი იქნება საქართველოში აპლიკაციის გამოყენების არეალის გაფართოება.
ქუანგ-იანგ კიმმა აპლიკაცია GECSA UNDP-ის პროექტის „მრავალმხრივი საფრთხეების ადრეული გაფრთხილების სისტემის გაფართოება და კლიმატთან დაკავშირებული ინფორმაციის გამოყენება საქართველოში" ფარგლებში, სოფლის განვითარების სააგენტოსთან, სოფლის მეურნეობის სამეცნიერო-კვლევით ცენტრთან და გარემოს ეროვნულ სააგენტოსთან პარტნიორობით, სეულის ეროვნული უნივერსიტეტის წარმომადგენლებთან ერთად შექმნა.

გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილეები ლაშა დოლიძე და ზურაბ ეზუგბაია, გაეროს განვითარების პროგრამა UNDP-ის წარმომადგენლები და სამინისტროს შესაბამისი უწყების და სამსახურის ხელმძღვანელი პირები ესწრებოდნენ.

ინფორმაციას გარემოს დაცვისა და სოფლის მეურნეობის სამინისტრო ავრცელებს.