დღეიდან არალეგალი მიგრანტების დასაქმება აიკრძალა - მუდმივი ბინადრობის არმქონე უცხოელები ვეღარ იმუშავებენ კურიერად, ტაქსის მძღოლად და გიდად

დღეიდან არალეგალი მიგრანტების დასაქმება აიკრძალა. მთავრობის პრიორიტეტი საქართველოს მოქალაქეა. მუდმივი ბინადრობის არმქონე უცხოელები ვეღარ იმუშავებენ კურიერად, ტაქსის მძღოლად და გიდად.

ბიზნესი კი ვალდებული იქნება საკუთარი ვაკანსიები შრომის ბაზრის საინფორმაციო სისტემაში ატვირთოს, პარალელურად, დასაქმების სააგენტო ადგილობრივი კადრის ძიებას დაიწყებს და თუკი ვაკანტურ პოზიციაზე მოთხოვნა არ იქნება, ამის შემდეგ შეძლებს დამსაქმებელი უცხო ქვეყნის მოქალაქის დასაქმებაზე განაცხადის გაკეთებას. ეს არის პასუხი იმ გამოწვევაზე, რომლის უკანაც, ქვეყანაში უკანონოდ შემოსული მიგრანტები დგანან.

შრომით იმიგრანტსა და თვითდასაქმებულ უცხოელზე შრომითი საქმიანობის უფლების გაცემის წესის შესახებ საქართველოს მთავრობის დადგენილების N3 დანართში ჩამოთვლილია ის პროფესიები და შრომითი/სამეწარმეო საქმიანობები, რომლებზეც დაწესებულია წლიური კვოტები. მუდმივი ბინადრობის არმქონე უცხო ქვეყნის მოქალაქეებისთვის ნულოვანი კვოტა განისაზღვრა შემდეგ საქმიანობებზე: საკურიერო მომსახურება, მგზავრთა გადაყვანა და ტურისტებისთვის გიდების სერვისის მიწოდება.

დადგენილების თანახმად, საქართველოში მუდმივი ბინადრობის ნებართვის არმქონე უცხოელის მიერ, საქართველოში ადგილობრივ დამსაქმებელთან შრომითი მოწყობა და ანაზღაურებადი შრომითი საქმიანობის განხორციელება, ან ადგილობრივ დამსაქმებელთან შრომითი ურთიერთობა დისტანციურად, ასევე საქართველოში მუდმივი ბინადრობის ნებართვის არმქონე უცხოელის მიერ საქართველოში სამეწარმეო/შრომითი საქმიანობა, დასაშვებია მხოლოდ ამ უცხოელის მიერ შრომითი საქმიანობის უფლების მოპოვების შემდგომ.

საქართველოს მთავრობის დადგენილება, რომელსაც ხელს ირაკლი კობახიძე აწერს, მიმდინარე წლის 1-ელი ამოქმედდა.