ირაკლი ქადაგიშვილი: არ შეიძლება, საქართველოს ამ ოპოზიციისგან რაიმე სიკეთის მოლოდინი ჰქონდეს, ხელისუფლებას ჰყავს არა სუსტი, არამედ დესტრუქციული ოპოზიცია

ეს ალიანსი და ლიდერები დაკავშირებულია საქართველოში დესტრუქციული დღის წესრიგის გატარებასთან, მათი საგარეო მფარველობაც ამ დესტრუქციის გატარებისთვისაა, მათი დღის წესრიგი იყო, არის და იქნება საქართველოში დესტრუქციული ქმედებების განხორციელება, მათ მიზნებშიც ზუსტად იგივე წერია, - ამის შესახებ პარლამენტის თვითმმართველობის კომიტეტის თავმჯდომარემ ირაკლი ქადაგიშვილმა განაცხადა.

მისი თქმით, საკონსტიტუციო სარჩელი იმიტომ არის შეტანილი, რომ „თავიდან ბოლომდე დესტრუქციაზე არიან აწყობილი“.

„როგორც ჩანს, ალიანსში ვიღაცას უნდა მეტი პოზიცია ჰქონდეს, ვიღაცას სხვა მიზნები აწუხებს. მიხეილ სააკაშვილი არ დაუშვებს, რომ მის ხელში გამოზრდილი და გამობრძმედილი დექსტრუქვისტები მისი კონტროლის გარეშე გავიდნენ. ამიტომ, მათგან უპირობო აღიარებას ითხოვს და ამბობს, რომ მისი ამომრჩეველი ყველაზე დიდია.

ვინც სააკაშვილს ეწინააღმდეგება, უნდათ, რომ პროგრესული სახე შეინარჩუნონ. ამიტომ, ფიქრობენ, რომ სააკაშვილი შემოქმედია მძიმე ცხრა წლის. ამ სახის შენარჩუნება ვიზუალის შეცვლით არ ხდება. შინაარსობრივად იმავეს აკეთებენ, რასაც დესტრუქცია ჰქვია.

არ შეიძლება, საქართველოს ამ ოპოზიციისგან რაიმე სიკეთის მოლოდინი ჰქონდეს. ხელისუფლებას ჰყავს არა სუსტი, არამედ დესტრუქციული ოპოზიცია. ამიტომ, ეს ცნება უნდა გავყოთ. სახელმწიფოს წინააღმდეგ დესტრუქცია სხვაა. შეიძლება, ნორმალური ოპოზიციონერი იყო, მაგრამ სუსტი იყო. დესტრუქცია და სისუსტე კი სხვადასხვაა“, - აღნიშნა ქადაგიშვილმა.