ირაკლი ქადაგიშვილი: დაუნდობელი ბრძოლა მიდის და ჩვენ ამ დაუნდობელ ბრძოლაში თავი უნდა გადავირჩინოთ, ესაა საქართველოს ნომერ პირველი ამოცანა

ჩვენ თუ ჰელსინკის კომისიის განცხადებებს თავიდან ბოლომდე გავყვებით, ყოველთვის ტყუილზე იყო დამყარებული. სააკაშვილი ხომ ლამის დამარხეს - ჯვარი წერია, ღმერთმა დიდხანს აცოცხლოს – მაგრამ ბოდიში მოიხადეს? ამაზე ხომ არ მოუხდიათ ბოდიში? - ამის შესახებ „ქართული ოცნების“ წევრმა ირაკლი ქადაგიშვილმა განაცხადა.

მისი თქმით, დაუნდობელი ბრძოლა მიმდინარეობს, ამიტომ ქვეყანას გადარჩენა სჭირდება.

„საქართველოს ამის გამო ხომ ასანქცირებდნენ. ახლა ხომ ათასობით ქართველის მოწამვლას ხელი მოაწერეს ისე, რომ არც კი უკითხავთ, სიმართლეა თუ ტყუილი. გამოძიებასაც და სანქციებსაც ითხოვენ. მაგათი მიზანი, ხომ ვიცით, რა არის? უილსონს ფული რაში აქვს აღებული, ხომ ვიცით? როდემდე უნდა ვიყოთ ამათი შანტაჟის შემყურენი და ასე ვუყუროთ, როგორ დაგვაშანტაჟებენ, ათასი უბედურებისკენ როგორ გვიბიძგებენ? ჩვენ, ბოლოს და ბოლოს, სახელმწიფო ვართ, ერი ვართ, თავმოყვარეობა არ გაგვაჩნია?! შეიძლება ყოველი „ფეიკის“ გარშემო ქვეყანაში დაძაბულობა იყოს და ახალი შხამი შემოდიოდეს? ამ რეალობას თვალი უნდა გავუსწოროთ და მივხვდეთ, რომ ეს სამყარო ვარდისფერი ფერებით დახატული არ არის. დაუნდობელი ბრძოლა მიდის და ჩვენ ამ დაუნდობელ ბრძოლაში თავი უნდა გადავირჩინოთ. ესაა საქართველოს ნომერ პირველი ამოცანა“, - აღნიშნა ქადაგიშვილმა.