გივი მიქანაძე აზერბაიჯანელ კოლეგას შეხვდა

დუბაიში მიმდინარე მთავრობათა სამიტის ფარგლებში საქართველოს განათლების, მეცნიერებისა და ახალგაზრდობის მინისტრმა გივი მიქანაძემ აზერბაიჯანის რესპუბლიკის მეცნიერებისა და განათლების მინისტრ ემინ ამრულაევთან სამუშაო შეხვედრა გამართა.

მხარეებმა თანამშრომლობის ფარგლებში მიმდინარე პროექტების შედეგები და მათი გაფართოების პერსპექტივები განიხილეს.

ხაზი გაესვა საქართველოსა და აზერბაიჯანს შორის განათლების სფეროში არსებულ მრავალწლიან და წარმატებულ პარტნიორობას. გივი მიქანაძემ აღნიშნა, რომ აზერბაიჯანი საქართველოსთვის მნიშვნელოვანი პარტნიორია და ორმხრივი ურთიერთობები ხელს უწყობს ერთობლივი ხედვების ჩამოყალიბებასა და კონკრეტული შედეგების მიღწევას.

განსაკუთრებული ყურადღება გამახვილდა აზერბაიჯანელი და ქართველი მასწავლებლების გადამზადებასა და ამ მიმართულებით განხორციელებულ აქტივობებზე.

თავის მხრივ, აზერბაიჯანის განათლების მინისტრმა დადებითად შეაფასა ქვეყნებს შორის არსებული თანამშრომლობის დინამიკა და ორი სამინისტროს სამუშაო ჯგუფების საქმიანობა. მან ერთობლივი საგანმანათლებლო და სამეცნიერო პროექტების განხორციელების მზაობა კიდევ ერთხელ გამოხატა.

მხარეებმა განათლების ყველა საფეხურზე პარტნიორობის გაღრმავების მზადყოფნა დაადასტურეს და ამ მიმართულებით სამომავლო გეგმებზე იმსჯელეს.

ინფორმაციას საქართველოს განათლების, მეცნიერებისა და ახალგაზრდობის სამინისტრო ავრცელებს.