ირანის საგარეო საქმეთა მინისტრი: ჩვენ არ დავნებდებით, ტრამპმა ბოდიში უნდა მოიხადოს, არავის შეუძლია, ახალი უზენაესი ლიდერის არჩევაში ჩაერიოს

ირანის საგარეო საქმეთა მინისტრი აბას არაღჩი აცხადებს, რომ აშშ-ის პრეზიდენტმა დონალდ ტრამპმა ბოდიში უნდა მოუხადოს ირანს და სპარსეთის ყურის ქვეყნებს ისლამური რესპუბლიკის წინააღმდეგ მიმდინარე ომის დაწყების გამო.

„სწორედ შეერთებული შტატების პრეზიდენტმა უნდა მოუხადოს ბოდიში რეგიონის ხალხს და ირანელ ხალხს იმ მკვლელობებისა და ნგრევისთვის, რაც მათ ჩვენს წინააღმდეგ განახორციელეს“, - განაცხადა არაღჩიმ ამერიკული ტელეარხის NBC-ის ეთერში.

არაღჩის თქმით, ირანელი მაღალი თანამდებობის პირების მკვლელობის მიუხედავად, ირანის მთავრობა ქვეყნის მართვას აგრძელებს და „ყველაფერი თავის ადგილზეა“.

არაღჩიმ ასევე უარყო ტრამპის მოთხოვნა, რომ მან უნდა გადაწყვიტოს, ვინ იქნება ირანის შემდეგი ლიდერი. „ჩვენ არავის ვაძლევთ ჩვენს საშინაო საქმეებში ჩარევის უფლებას“, - აღნიშნა არაღჩიმ.

ირანის უმაღლესი დიპლომატის თქმით, ირანი არასდროს დაეთანხმება ტრამპის მოთხოვნას, რომ ომი ირანის „უპირობო კაპიტულაციით“ დასრულდეს.

„არავითარი დანებება. ჩვენ გავაგრძელებთ წინააღმდეგობის გაწევას იქამდე, ვიდრე საჭირო იქნება“, - აღნიშნა მან.

არაღჩიმ ასევე თქვა, რომ ირანი აუცილებლად არ დათანხმდება ცეცხლის შეწყვეტას, თუ აშშ ამას შესთავაზებს.

„ბოლოს ჩვენ ცეცხლის შეწყვეტის შეთანხმებას დავთანხმდით, მაგრამ ამჯერად ყველაფერი სხვაგვარადაა. წელიწადში მეორედ თავდასხმის შემდეგ მათ კვლავ ცეცხლის შეწყვეტის მოთხოვნა სურთ? ეს ასე არ მუშაობს. ომი სამუდამოდ უნდა დასრულდეს. თუ ამას არ მივაღწევთ, ვფიქრობ, ბრძოლა უნდა გავაგრძელოთ“, - განაცხადა ირანის უმაღლესი დონის დიპლომატმა.

ამასთან, მან უარყო, რომ ირანი ახლო აღმოსავლეთში მეზობელ ქვეყნებს თავს ესხმის.

„ჩვენ ვუტევთ ამერიკულ ბაზებს... რომლებიც, სამწუხაროდ, ჩვენი მეზობლების მიწაზეა განთავსებული“, - აღნიშნა მან.

არაღჩი ასევე გამოეხმაურა ცნობებს, რომ ტრამპი ირანში სპეციალური დანიშნულების რაზმების გამოყენებას განიხილავს.

„ჩვენ გვყავს მამაცი ჯარისკაცები, რომლებიც ელოდებიან ჩვენს მიწაზე შემოსულ მტერს, რათა შეებრძოლონ მას, მოკლან და გაანადგურონ“, - განაცხადა მან.

გავრცელებულ ინფორმაციასთან დაკავშირებით, რომ რუსეთი ირანს რეგიონში აშშ-ის ჯარების მიზანში ამოღებაში ეხმარება, არაღჩი თანამშრომლობას არ უარყოფს, მაგრამ ამ ინფორმაციას არ ადასტურებს.

„ირანსა და რუსეთს შორის სამხედრო თანამშრომლობა სიახლე არ არის. ეს საიდუმლო არ არის. ეს წარსულშიც იყო, დღესაც არსებობს და მომავალშიც გაგრძელდება“, - დაასკვნა მან.