ლაშხი „იგლ ჰილსის“ ინვესტიციაზე: როდესაც მსგავსი ტიპის პროექტს აკრიტიკებ, პირველ რიგში, ხარ ქვეყნის ინტერესების წინააღმდეგ მომართული

„როდესაც მსგავსი ტიპის პროექტს აკრიტიკებ, ხარ ქვეყნის ინტერესების წინააღმდეგ მომართული“, - ამის შესახებ  მმართველი გუნდის დეპუტატმა მარიამ ლაშხმა „იგლ ჰილსის“ ინვესტიციაზე საუბრისას განაცხადა.

დეპუტატის თქმით, მსგავსი ტიპის ტყუილი განცხადებებით ოპოზიცია იმედოვნებს, რომ ხალხში ემოციებს გააღვიძებს.

„ამ ინვესტიციასთან დაკავშირებით სპეკულაციები არის მავნებლობა, მით უმეტეს, როდესაც ეს წამოსულია ისეთი პარტიების მხრიდან, რომელთა დამფუძნებლებიც არიან ბიზნესმენები. პირველ რიგში, მათ უნდა იცოდნენ და ჰქონდეთ ინფორმაცია თუნდაც კომერციულ საიდუმლოებასთან დაკავშირებით, რომ ეს არის ჩვეული საერთაშორისო პრაქტიკა და არაერთი ხელშეკრულება აქვს საქართველოსაც დადებული, რომელსაც აქვს საიდუმლოების კომპონენტი.

ისინი აპელირებდნენ, რომ მაგალითად, მოხდება არაბიზაცია, მიწის გასხვისება, მეჩეთების მშენებლობა და ასეთი სისულელეები. მსგავსი ტიპის ტყუილი განცხადებებით ჰგონიათ, რომ ხალხს გაუღვიძებენ ემოციებს. დღეს ისინი განიკითხავენ იმ ხელშეკრულებას, სადაც სახელმწიფოს წილი არის 33%, სადაც მიწის საკუთრება არის სახელმწიფო, იმ პირობებში, როდესაც სახელმწიფოს აქვს მიგრაციული პოლიტიკა კიდევ უფრო მეტად გამკაცრებული და არავითარი არაბიზაცია და მსგავსი ტიპის სპეკულაციებს არ მოიცავს.

სახელმწიფოში შეიქმნება 24 000 სამუშაო ძალა პროექტის განხორციელებაში და, სულ მცირე, 8 000 მუდმივი სამუშაო ძალა. შესაბამისად, როდესაც მსგავსი ტიპის პროექტს აკრიტიკებ, პირველ რიგში, ხარ ქვეყნის ინტერესების წინააღმდეგ მომართული“, - აღნიშნავს ლაშხი.