ლევან მაჭავარიანი: აბსოლუტურად ყველაფერი გავაკეთეთ უკრაინისთვის, ერთადერთი, ჩვენ არ შევეხიდეთ ჩვენი ხალხით ამ ომში

ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა „რუსთავი 2-ის“ გადაცემაში „დებატები“ საქართველოსა და ევროკავშირის ურთიერთობებზე ისაუბრა.

როგორც დეპუტატი აცხადებს, ამ ურთიერთობების დაძაბვა უკრაინაში რუსეთის აგრესიის შემდეგ დაიწყო.

ლევან მაჭავარიანი აღნიშნავს, რომ ამ პერიოდში, საქართველოს არა მხოლოდ ბრიუსელის ბიუროკრატიასთან დაეძაბა ურთიერთობა, არამედ ამერიკის შეერთებული შტატების ყოფილ ადმინისტრაციასთანაც.

„ამ ურთიერთობების დაძაბვა დაიწყო ზუსტად იმ დღიდან, რა დღესაც დაიწყო უკრაინაში რუსეთის აგრესია და ეს შემთხვევითი არ არის. იქიდან გამომდინარე, რომ ამ დროს, ჩვენ არა მხოლოდ ევროკავშირთან და ბრიუსელის ბიუროკრატიასთან დაგვეძაბა ურთიერთობა, არამედ ამერიკის შეერთებული შტატების ყოფილ ადმინისტრაციასთანაც.

ვინაიდან, ყოფილ ადმინისტრაციაშიც და დღევანდელ ბრიუსელის დემოკრატიაშიც არაფორმალური ოლიგარქიული მმართველობის ძალიან სერიოზული გავლენებია, რასაც ბატონი ტრამპი ებრძვის და პირდაპირ ეძახის „დიფ სთეითის“ გავლენებს.

ჩვენ აბსოლუტურად ყველაფერი გავაკეთეთ უკრაინისთვის, რაც შესაძლებელი იყო, ჰუმანიტარული დახმარების კუთხით, შევიფარეთ 30 ათასამდე უკრაინელი, დავუნიშნეთ მათ სოციალური დახმარებები, ბავშვებს გავუხსენით სასწავლებლები, აბსოლუტურად ყველა რეზოლუციას მივუერთდით, სადაც ათობით ქვეყანა თავს იკავებდა და აბსოლუტურად ყველა საერთაშორისო დოკუმენტი რაც არსებობს, საქართველო არის ან თანასპონსორი, ან ამ რეზოლუციას მიერთებული მხარე. შესაბამისად, ყველანაირი დახმარება გავუწიეთ, ერთადერთი, ჩვენ არ შევეხიდეთ ჩვენი ხალხით ამ ომში, ვინაიდან, ეს ჩვენი ომი არ არის.

რაც ბატონმა ტრამპმა დაიკავა ოვალური ოფისი, ძალიან ბევრ რაღაცას დაერქვა თავის სახელი. მათ შორის ამ ომს დაერქვა თავისი სახელი და მათივე თქმით, ეს არის პროქსი ომი დასავლეთსა და რუსეთს შორის, სადაც სატელიტ ქვეყნად იქნა უკრაინა გამოყენებული. ეს არის მკაფიოდ გაცხადებული და აბსოლუტურად არავინ ოპონირებას არ უწევს ამერიკის შეერთებული შტატების დღევანდელ ადმინისტრაციას ამ შეფასებაში. დასავლეთში მოიაზრება წინა ადმინისტრაცია და ბრიუსელი.

ამ ომში ძალიან მაღალია ფსონები და პროგრამა მაქსიმუმი იყო რუსეთის დამარცხება, პროგრამა მინიმუმი იყო რუსეთის შესუსტება იმ დონეზე, რომ სისტემის ნგრევა დაწყებულიყო შიგნით და მეორე პროქსი ქვეყნად გათვალისწინებული იყო საქართველო“, - აღნიშნა მაჭავარიანი.