ლევან მაჭავარიანი ჩინეთის ვიცე-პრეზიდენტის ვიზიტის შესახებ ოპოზიციის დუმილზე: ნარატივში დაიკარგა რადიკალური ოპოზიცია

„აგენტურამ მიიღო დავალება, რომ ჩინეთი არ ელანძღათ იქიდან გამომდინარე, რომ კონტრპროდუქტიული აღმოჩნდებოდა“, - ასე გამოეხმაურა პარლამენტის ფრაქცია „ქართული ოცნების“ თავმჯდომარის პირველი მოადგილე ჩინეთის ვიცე-პრეზიდენტის საქართველოში ვიზიტზე ოპოზიციის დუმილს.

როგორც მაჭავარიანმა განაცხადა, ჩინეთთან მიმართებით ოპოზიცია ნარატივში დაიკარგა.

„გვახსოვს, რამდენიმე წლის წინ როგორ ღლიცინებდნენ და რა ეპითეტებით მოიხსენიებდნენ ჩინეთის სახალხო რესპუბლიკას, თუმცა ამ ერთი წლის განმავლობაში ვიხილეთ ქალბატონი ურსულა ფონ დერ ლაიენი, საფრანგეთის, გერმანიის, დიდი ბრიტანეთის ლიდერები, როგორ ჩაბრძანდნენ ბატონ სი ძინპინთან და როგორ გააფორმეს სტრატეგიული პარტნიორობები, რა განცხადებები აკეთეს - თურმე მათი ქვეყნებისთვის სასიცოცხლოდ მნიშვნელოვანი ყოფილა ჩინეთთან მჭიდრო კავშირები.

შესაბამისად, ნარატივში დაიკარგა რადიკალური ოპოზიცია და ახლა, რა თქმა უნდა, მათთვის კონტრპროდუქტიული იქნებოდა ამ ყველაფრის ფონზე, რომ ჩინეთზე ისევ ქილიკით დაეწყოთ საუბარი.

შესაბამისად, მიიღეს დავალება, რომ ჯობდა საერთოდ არ ესაუბრათ. ორი დღის განმავლობაში ხმა არ ამოუღია არცერთ აგენტურული ოპოზიციური პარტიის წარმომადგენელს, არც მათ მედიასაშუალებებს ასეთი რანგის ვიზიტთან დაკავშირებით“, - აღნიშნა ფრაქცია „ქართული ოცნების“ თავმჯდომარის პირველი მოადგილე.