ლევან მაჭავარიანი: ევროკავშირის მომავალ წევრს ვეტოს უფლება თუ არ უნდა ჰქონდეს, კითხვის ნიშნები გაჩნდება იმ სურვილებთან, რაც კანდიდატ ქვეყნებს გაწევრიანებასთან დაკავშირებით აქვთ

„ვეტოს დაძლევის მექანიზმის საკითხზე მუშაობა მიდის და საბოლოო შედეგი არ ვიცით, თუმცა საბოლოო შედეგი ის თუ იქნება, რასაც აანონსებენ, ეს ძალიან მძიმეა“, – ამის შესახებ პარლამენტის ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა განაცხადა.

მისივე თქმით, ევროკავშირის პოზიცია, როგორიცაა ტრამპის ადმინისტრაციასთან ურთიერთობის შეზღუდვა და ვეტოს თავიდან აცილების მექანიზმი, კანდიდატ ქვეყნებს კითხვის ნიშნებს უჩენთ გაწევრიანებასთან დაკავშირებით.

„გავიხსენოთ, რომ დღევანდელი პოზიცია, რაც ჯერ ევროკავშირს არ გადაუხედავს არის, რომ კანდიდატმა ქვეყნებმა ამერიკის შეერთებულ შტატებთან ურთიერთობები უნდა აიკრძალონ. შესაბამისად თუ მომავალმა წევრმა ურთიერთობა უნდა აიკრძალოს ტრამპის ადმინისტრაციასთან და ამავე დროს ვეტოს უფლება არ ჰქონდეს, კითხვის ნიშნები გაჩნდება იმ სურვილებთან დაკავშირებით, რაც კანდიდატ ქვეყნებს აქვთ ევროკავშირში გაწევრიანებასთან დაკავშირებით. ჩვენ ვისურვებდით, რომ ეს პოზიცია უფრო მკაფიო ყოფილიყო და ოფიციალურ პირებს უფრო მეტი განმარტება გაეკეთებინათ”, – განაცხადა ლევან მაჭავარიანმა.

ცნობისთვის, შიდა დოკუმენტების პროექტებზე დაყრდნობით მედია წერს, რომ ევროკავშირი გადაწყვეტილებების მიღებისას ცალკეული ქვეყნების ვეტოს გვერდის ავლის შესაძლებლობას განიხილავს.