ლევან მაჭავარიანი: მავნებლები აგრძელებენ მავნებლობას, ზუსტად ანალოგიურს, როგორც ჩვენ ვიხილეთ რუსეთ-უკრაინის ომის დროს, როდესაც ოპოზიცია საქართველოს აბრალებდნენ, თითქოს შავი ხვრელი ვიყავით სანქციების არიდების კუთხით

მავნებლები აგრძელებენ მავნებლობას, ზუსტად ანალოგიურს, როგორც ჩვენ ვიხილეთ რუსეთ-უკრაინის ომის დროს, როდესაც ეს რადიკალური ოპოზიცია თავიანთი მდიდარი ენჯეოებით საქართველოს აბრალებდნენ, თითქოს შავი ხვრელი ვიყავით სანქციების არიდების კუთხით, თითქოს რაღაც ტიპის დახმარებას ვუწევდით რუსეთს შეიარაღების ნაწილში, აბსურდები, რასაც აბრალებდნენ საკუთარ ქვეყანას იქიდან გამომდინარე, რომ აქეთაც გადმოსულიყო ცეცხლის რკალი, - განაცხადა ფრაქცია „ქართული ოცნების“ თავმჯდომარის პირველმა მოადგილემ, ლევან მაჭავარიანმა.

მისივე თქმით, ამ შემთხვევაშიც ზუსტად იმავეს ვადევნებთ თვალყურს. ეს არის მტრული განცხადებები.

„ნებისმიერი ეს აქტორი, ვინც გამოირჩეოდა და დღესაც გამოირჩევა ასეთი მოღალატეობრივი განცხადებების გაკეთებით, ისინი ყველა ემსახურება გარე ძალებს. ყველაზე თვალსაჩინო ის არის, რომ თითოეული მათგანი ფინანსდება უცხოეთიდან და ძალიან საინტერესოა, რომ ზუსტად იგივე აქტორები არიან, ვინც ისტერიკაში იყვნენ, როდესაც ჩვენ ვიღებდით გამჭვირვალობის კანონს. იმიტომ იყვნენ ისტერიკაში, რომ მათ რომ ფული ერიცხებათ მტრული საქმიანობისთვის, არ უნდოდათ, რომ ეს ყველაფერი გამოაშკარავებულიყო“, - აღნიშნა ლევან მაჭავარიანმა.

როგორც ცნობილია, ბოლო დღეების განმავლობაში გაკეთებულ განცხადებებთან დაკავშირებით სახელმწიფო უსაფრთხოების სამსახურმა გამოძიება დაიწყო.

გივი თარგამაძემ ერთ-ერთი მედიის ეთერში თქვა, რომ საქართველოში ტერორისტების უნივერსიტეტი ფუნქციონირებს.

გიორგი კანდელაკის და ლუკ კოფის ერთობლივი კვლევა, სათაურით „საქართველოს ირანული შეტრიალება: თეირანის გავლენის სწრაფი გაფართოება ერთ დროს ამერიკის ძლიერ მოკავშირე ქვეყანაში“, ჰადსონის ინსტიტუტმა“ გამოაქვეყნა, კვლევაში ავტორები ცდილობენ ამტკიცონ, რომ საქართველოში ირანის გავლენები გაიზარდა.

ერთ-ერთი ტელეკომპანიის ეთერში გენერალ-მაიორმა ვახტანგ კაპანაძემ იმ სტრატეგიულ ობიექტებზე ისაუბრა, რომლებიც შესაძლოა ირანის სამიზნე გახდეს და მიუთითა, რას იზამდა თავად ირანის ხელისუფლების ადგილზე.

ახლო აღმოსავლეთში მიმდინარე პროცესების პარალელურად, მორიგი შეტევა და უსაფუძვლო ბრალდებები საქართველოს მიმართ - სტატია სათაურით „საქართველო ირანისთვის სანქციებისთვის თავის არიდების ცენტრად იქცევა“ The Hill-ში გამოქვეყნდა.

თავდაცვის ყოფილმა მინისტრმა, არასამთავრობო ორგანიზაცია „სამოქალაქო იდეის“ თავმჯდომარემ, თინა ხიდაშელმა განაცხადა, რომ საქართველოში ტერორისტების სკოლა, ე.წ. უნივერსიტეტი ფუნქციონირებს.