ლევან მაჭავარიანი: საქმეებზე, რომლებიც რეზონანსული იყო და პოლიტიკურ იარლიყს აწებებდნენ, ყველა შემთხვევაში სტრასბურგის სასამართლომ დაადგინა, რომ მართლმსაჯულება მოქმედებდა მაღალი სტანდარტით

„საქმეებზე, რომლებიც რეზონანსული იყო და პოლიტიკურ იარლიყს აწებებდნენ, აბსოლუტურად ყველა შემთხვევაში სტრასბურგის სასამართლომ დაადგინა, რომ მართლმსაჯულება მოქმედებდა მაღალი სტანდარტით“, - ასე გამოეხმაურა ფრაქცია „ქართული ოცნების“ თავმჯდომარის მოადგილე ლევან მაჭავარიანი ევროკავშირის პრესსპიკერის სოციალურ ქსელში გამოქვეყნებულ განცხადებას.

როგორც დეპუტატი აცხადებს, მსგავსი მოწოდებები სიახლე არ არის და აღნიშნავს, რომ „პირიქით, უფრო გაგვიკვირდებოდა ამასთან დაკავშირებით რაიმე ასეთი დეზინფორმაციული განცხადება რომ არ მოგვესმინა“.

„ბატონ ნიკა მელიასთან დაკავშირებით მეორე სერიას ვუყურებთ, ვინაიდან, იგივე განცხადებები იყო 2021 წელს მელიას დაკავებასთან დაკავშირებით.

სხვათა შორის, 3 წლის თავზე, სტრასბურგის სასამართლომ დაადგინა ამ შემთხვევაშიც, რომ ქართული მართლმსაჯულება მოქმედებდა ძალიან მაღალი სტანდარტით და ბოდიში არავის მოუხდია.

მინდა ჩვენს საზოგადოებას შევახსენო კიდევ გახმაურებული საქმეები, რომელიც იყო ბატონი გვარამიას გარშემო, ბატონი მერაბიშვილის გარშემო.

ნებისმიერი საქმე, რომელიც რეზონანსული იყო და თითქოს და რაღაც პოლიტიკურ იარლიყს აწებებდნენ, შემდეგ ეს საქმეები წავიდა სტრასბურგის სასამართლოში და აბსოლუტურად ყველა შემთხვევაში სტრასბურგის სასამართლომ აქაც დაადგინა, რომ მართლმსაჯულება მოქმედებდა მაღალი სტანდარტით.

ეს ჩვენთვის სიახლე არ არის, პირიქით, უფრო გაგვიკვირდებოდა ამასთან დაკავშირებით რაიმე ასეთი დეზინფორმაციული განცხადება რომ არ მოგვესმინა“, - აღნიშნავს მმართველი გუნდის დეპუტატი.

ცნობისთვის, ევროკავშირის პრესსპიკერი ზურაბ ჯაფარიძის, ნიკა მელიას და სხვა პოლიტიკოსებისა და აქტივისტების გათავისუფლებას ითხოვს.