მაკა ბოჭორიშვილი: უმაღლეს დონეზე ფასდება ურთიერთობები, რაც დღეს არსებობს საქართველოსა და ყაზახეთს შორის, ერთობლივად გამოიხატა მზაობა, გავაგრძელოთ მუშაობა ყაზახურ მხარესთან და მეტად წინ წავწიოთ პოლიტიკური თუ ეკონომიკური კავშირები

საქართველოსა და ყაზახეთს შორის ურთიერთობებში ძალიან მნიშვნელოვანია მაღალი დონის ვიზიტების დინამიკა, - ამის შესახებ საქართველოს საგარეო საქმეთა მინისტრი მაკა ბოჭორიშვილი ყაზახეთში განაცხადა.

საგარეო საქმეთა მინისტრის თქმით, ეს ვიზიტიც გამოიყენება იმისთვის, რომ უმაღლეს დონეზე იყოს განხილული საქართველოსა და ყაზახეთს შორის არსებული ურთიერთობების მნიშვნელოვანი საკითხები.

„პრიორიტეტი არის ეკონომიკური ურთიერთობების განვითარება. პოზიტიურად, უმაღლეს დონეზე ფასდება ის ურთიერთობები, რაც დღეს არსებობს საქართველოსა და ყაზახეთს შორის, თუმცა ორივე მხარე ვთანხმდებით იმაზე, რომ არის პოტენციალი, შესაძლებლობები სხვადასხვა მიმართულებით და ამ მიმართულებებით დღეს ერთობლივად გამოიხატა მზაობა იმისათვის, რომ გავაგრძელოთ მუშაობა ყაზახურ მხარესთან და უფრო მეტად წინ წავწიოთ პოლიტიკური თუ ეკონომიკური კავშირები ორ ქვეყანას შორის. პრიორიტეტი არის, რა თქმა უნდა, დაკავშირებადობის პროექტები, რაც უკავშირდება საქართველოს გავლით სხვადასხვა მიმართულებით პროექტების განხორციელებას. ამ თვალსაზრისით ყაზახეთისთვის საქართველო საინტერესო ქვეყანაა. მნიშვნელოვანია ჩვენს ქვეყნებს შორის თანამშრომლობა.

პრემიერ-მინისტრის ვიზიტიც გამოყენებული არის და იქნება იმისათვის, რომ სწორედ ამ საკითხებზე იყოს საუბარი ყაზახურ მხარესთან, თუ როგორ შეიძლება გავაღრმაოთ ურთიერთობები და უკეთ გამოვიყენოთ ის კავშირები, რაც ორ ქვეყანას შორის არსებობს, რათა უკეთესად იყოს წარმოჩენილი საქართველო დაკავშირებადობის პროექტებში“, - განაცხადა მაკა ბოჭორიშვილმა.