მარიამ ქვრივიშვილი: გამოცდილი ინვესტორი ქვეყანაში შემოდის ძალიან დიდი ცოდნით, გამოცდილებით და ხარისხის ამაღლების შესაძლებლობით - ეს ხელშესახებია ხოლმე კონკრეტულ სექტორებში

„წყლის მომავლის პირველ საერთაშორისო ფორუმზე“ სიტყვით გამოსვლისას ეკონომიკისა და მდგრადი განვითარების მინისტრმა, სხვა მნიშვნელოვან საკითხებთან ერთად, ქვეყანაში ინვესტიციების განხორციელების მნიშვნელობასა და საქართველოს ხელისუფლების საინვესტიციო პოლიტიკის პრიორიტეტებზე ისაუბრა, - ინფორმაციას საქართველოს ეკონომიკისა და მდგრადი განვითარების სამინისტრო ავრცელებს.

მარიამ ქვრივიშვილის შეფასებით, ინვესტორებს, ზოგადად, საკმაოდ დიდი ღირებულების მოტანა შეუძლიათ ქვეყნებისთვის და მეტწილად, ეს ცდება მხოლოდ კონკრეტული დარგების განვითარებას.

„გამოცდილი ინვესტორი ან ინვესტორთა ჯგუფი ქვეყანაში შემოდის ძალიან დიდი ცოდნით, დიდი გამოცდილებით, ისევე როგორც ხარისხის ამაღლების შესაძლებლობით - ამას ჩვენ განსაკუთრებულად ვხედავთ და ხელშესახებია ხოლმე კონკრეტულ სექტორებში, რომელიც პირდაპირ დაკავშირებულია უსაფრთხოებასთან, სერვისთან და სხვა მიმართულებებთან“, - აღნიშნა მარიამ ქვრივიშვილმა.

მინისტრის თქმით, განსაკუთრებით ხაზგასასმელია ის ცოდნა, გამოცდილება თუ სტანდარტები, რომელიც საერთაშორისო ინვესტორს ქვეყანაში მოაქვს. მარიამ ქვრივიშვილის განცხადებით, საქართველოს ეკონომიკა ძალიან მზარდია და ვითარდება ახალი პროექტები, მათ შორის, მინისტრმა აღნიშნა ისტორიული, 6.5 მლრდ აშშ დოლარის მოცულობის ინვესტიციის შემოსვლა ქვეყანაში, რომელიც თბილისსა და გონიოში ორი ახალი პროექტის განხორციელებას მოხმარდება.

„მისასალმებელია ყველა ინვესტიცია, რომელიც, ერთი მხრივ, გულისხმობს დამატებით დანახარჯებზე დამატებით ინვესტიციას კონკრეტული მიმართულებების განვითარების კუთხით, მაგრამ, მეორე მხრივ, განსაკუთრებით ღირებულია ის, რაც იქმნება ინვესტორების მხრიდან - ეს არის დამატებითი შესაძლებლობები ჩვენი ქვეყნის მოსახლეობისთვის, მათ შორის დასაქმების, ცნობიერების, განათლებისა თუ გარკვეული უნარ-ჩვევების გაზრდის, გაღრმავებისა და გაუმჯობესების თვალსაზრისით“, - განაცხადა ეკონომიკისა და მდგრადი განვითარების მინისტრმა.