„მინდა სიცოცხლე და თავისუფლება“ - მიხეილ სააკაშვილი

„მე არ მსურს არც ერთი თანამდებობა, მინდა სიცოცხლე, თავისუფლება, შესაძლებლობა თავისუფლად გადავადგილდებოდე საქართველოში და თავისუფალ, ბედნიერ ადამიანებს შორის, – მიხეილ სააკაშვილი ციხიდან მორიგ წერილს ავრცელებს.  

როგორც მისმა ადვოკატმა გიორგი გელხაურმა მედიას უთხრა, მას არ აქვს მოლოდინი რომ ხელისუფლება შეიწყალებს.

„რაც შეეხება იმ მოლოდინს, რომ იგივე რეჟიმი, რომელმაც სრულად სასაცილო საქმეები შემიკერა, ახლა შემიწყალებს, ნურავის ნუ გვაქვს ამის მოლოდინი. მე ვარ პუტინის პირადი პატიმარი, ესენი პირდაპირ იღებენ მითითებებს მოსკოვიდან და ამგვარად ჩემი გათავისუფლება შეუძლია მხოლოდ ქართველ ხალხს, რომელიც გაითავისუფლებს თავის თავს, გამათავისუფლებს მეც“, - წერია საქართველოს მესამე პრეზიდენტის წერილში.

სააკაშვილი ამბობს, რომ ქართველმა ხალხმა მოახდინა საარჩევნო რევოლუცია, როდესაც ყველა ქალაქში დაამარცხა „ოცნება“.

„ის, რომ გამყალბებლებით, სიის მაგიდის ქალბატონებით და ძველი ბიჭებით თქვენ ეს გამარჯვება მოგპარეს, სულაც არ მეტყველებს რეჟიმის სიძლიერეზე. რეჟიმს, რომელსაც სიტყვა რევოლუციაზე აკანკალებს, სიმტკიცის მარაგი მთლიანად ამოწურული აქვს და ახლა ჩვენი გამოსვლებით ყველგან ვაჩვენებთ მსოფლიოს და ივანიშვილს, რომ ჩვენი გამარჯვება გვეკუთვნის მხოლოდ ჩვენ და ასეთი სიმწარით მოპოვებული გამარჯვება ხალხს უნდა დავუბრუნოთ“.- ნათქვამია მიხეილ სააკაშვილის მორიგ წერილში, რომელიც დღეს მისმა ადვოკატმა ციხიდან გამოიტანა.

რაც შეეხება მის ჯანმრთელობის მდგომარეობას, ადვოკატი ამბობს, რომ სააკაშვილის ანალიზების მონაცემები ძალიან შემაშფოთებელია. ბექა ბასილაიას თქმით, მისთვის სასწრაფო ჰოსპიტალიზაცია სასიცოცხლოდ მნიშვნელოვანია.

ამავე თემაზე:

🔵"ჩემი პოზიცია ყოფილი პრეზიდენტის შეწყალებაზე მყარი და უცვლელია, არა და არასოდეს" - სალომე ზურაბიშვილი

🔵„მიხეილ სააკაშვილის ჯანმრთელობის მდგომარეობა სტაბილურია“ - სპეციალური პენიტენციური სამსახური