Netflix-ის სერიალის სცენარის ავტორმა აღიარა, რომ მოჭადრაკის შესახებ სიმართლე იცოდა - კომპანიამ სასამართლოში საქმის წარმოების შეწყვეტა ითხოვა

ქართველმა ხუთგზის მსოფლიო ჩემპიონმა, მოჭადრაკე ნონა გაფრინდაშვილმა Netflix-ს ცოტა ხნის წინ უჩივლა სერიალ The Queen’s Gambit-ში ნათქვამი ტექსტის გამო, რომ მას "არასდროს უთამაშია კაცი მოჭადრაკის წინააღმდეგ".

ნონა გაფრინდაშვილის ადვოკატის მაია მწარიაშვილის თქმით, სასამართლო ლოს-ანჯელესში შედგა, სადაც დაიკითხა სერიალის სცენარის ავტორი სკოტ ფრენკი.

ადვოკატის განმარტებით, სკოტმა აღიარა, რომ მოჭადრაკის შესახებ სიმართლე იცოდა.

გარდა ამისა, კომპანიამ სასამართლოში სამართალწარმოების შეწყვეტის შესახებ იშუამდგომლა.

ნონა გაფრინდაშვილის ინტერესებს იურიდიული კომპანია BLB იცავს. 

"ფრენკი იძულებული გახდა, ეღიარებინა, რომ იცოდა სიმართლე ნონა გაფრინდაშვილის კარიერული მიღწევების შესახებ, რაც ადასტურებს "ნეტფლიქსის" მიერ მცდარი ფაქტების მიზანმიმართულად გავრცელებას.

ამ დაკითხვამ უკვე შექმნა ცხადი სურათი.

Netflix-მა სკოტის ჩვენება საქმეს თავის სასარგებლოდ დაურთო. ახლა, როცა წარვადგინეთ ჩვენი პოზიცია, სკოტის ჩვენებას ვიყენებთ საჩვენოდ", – განაცხადა მაია მწარიაშვილმა.

ლაზიერის გამბიტი Netflix-ის ერთ-ერთი ყველაზე პოპულარული მინი სერიალია.

ლეგენდარულმა ქართველმა მოჭადრაკემ ნონა გაფრინდაშვილმა Netflix-ის წინააღმდეგ აშშ-ში, კალიფორნიის შტატში, სასამართლოში სარჩელი 16 სექტემბერს შეიტანა.

ნონა გაფრინდაშვილის ადვოკატები სარჩელით ლეგენდარული მოჭადრაკისთვის მიყენებული ზიანის ასანაზღაურებლად სულ მცირე 5 მილიონ დოლარს ითხოვენ.

ამასთან, გაფრინდაშვილი ითხოვს, შესაბამისი მონაკვეთი სერიიდან ამოიჭრას.

🔲 "გამაოცა, რადგან დამამცირებელია" - ნონა გაფრინდაშვილი Netflix-ს სიცრუის გამო სასამართლოში უჩივის

🔲 "რა ძალისხმევა დასჭირდებოდა ასეთი წარმატების მისაღწევად, ამ დროს "რაღაც სერიალი" აკნინებს მის განვლილ გზას" - თამარ ჟამურაშვილი ნონა გაფრინდაშვილს სოლიდარობას უცხადებს