პროკურატურა ზურაბ ზვიადაურის გათავისუფლებაზე: გაუგებარია, თუ რა გარემოებებით იხელმძღვანელა მოსამართლემ

საქართველოს პროკურატურა "გაუგებარს" უწოდებს თელავის რაიონული სასამართლოს მიერ 29 ნოემბერს მიღებულ გადაწყვეტილებას, რომლის მიხედვითაც ზურაბ ზვიადაური და ჯაბა ჯანგირაშვილი სასამართლო დარბაზიდან გირაოს სანაცვლოდ გაათავისუფლეს.

ამის შესახებ პროკურატურა, გამოქვეყნებულ განცხადებაში მიუთითებს.

უწყების ცნობით, მოსამართლემ ბრალდების მხარის მიერ წარმოდგენილი გარემოებები არ გაითვალისწინა.

"საქართველოს პროკურატურისთვის გაუგებარია, თუ რას დაეფუძნა და რა გარემოებებით იხელმძღვანელა თელავის რაიონული სასამართლოს მოსამართლე  მამუკა წიკლაურმა.

ბრალდების მხარე, სასამართლო პროცესზე სრულიად დასაბუთებულად ითხოვდა აღკვეთის ღონისძიების სახით პატიმრობის ძალაში დატოვებას  და აპელირებდა რეალურ საფრთხეებზე, რაც თავისუფლებაში ყოფნის შემთხვევაში დაკავშირებულია ბრალდებულთა მიერ შესაძლო ახალი დანაშაულის ჩადენასთან და მოწმეებზე ზემოქმედებასთან.

მიუხედავად ამისა, მოსამართლის მიერ ზემოხსენებული გარემოებები არ იქნა მხედველობაში მიღებული, რის გამოც განზრახ მკვლელობის ფაქტზე ბრალდებულს აღკვეთის ღონისძიება პატიმრობა  50 000-ლარიანი გირაოთი, ხოლო მეორე ბრალდებულს (ცეცხლსასროლი იარაღის დაუდევრად შენახვა, რამაც მძიმე შედეგი გამოიწვია) 5 000 ლარიანი გირაოთი შეუცვალა.

აღსანიშნავია, რომ წინასასამართლო სხდომაზე მიღებული გადაწყვეტილება არ საჩივრდება  და ამიტომ მოკლებული ვართ შესაძლებლობას აღნიშნული გადაწყვეტილება გავასაჩივროთ ზემდგომ ინსტანციაში.

ბრალდების მხარეს მიაჩნია, რომ მოსამართლის აღნიშნული გადაწყვეტილება არის დაუსაბუთებელი და მის მიერ გამოყენებული აღკვეთის ღონისძიება არ ემსახურება აღკვეთის ღონისძიების მიზნების შესრულებას", - აღნიშნულია პროკურატურის მიერ გავრცელებულ განცხადებაში.

თელავის რაიონულმა სასამართლომ 16 აგვისტოს, წინანდლის ტყეში მომხდარი მკვლელობის საქმეზე დაკავებული ძიუდოისტი ზურაბ ზვიადაური და კიდევ ერთი ბრალდებული ჯაბა ჯანგირაშვილი გირაოს სანაცვლოდ გაათავისუფლა. ზურაბ ზვიადაური მკვლელობის გამო, 17 ივლისს დააკავეს. პროკურატურა ზვიადაურისთვის პატიმრობას ითხოვს.

ამავე თემაზე:

🔲 ზურაბ ზვიადაური სასამართლო დარბაზიდან გაათავისუფლეს

🔲 ზვიადაური იქ ნორმალურად რომ მოქცეულიყო, ეს ამბავი არ მოხდებოდა - ნიკა კენჭოშვილის დედა კახეთში მომხდარ სისხლიან გარჩევაზე