სააკაშვილი: ერთი მაგარი კლუბიც უნდა გაიხსნას სუსის შენობაში მას შემდეგ, რაც სუსი გაუქმდება

მიხეილ სააკაშვილი სოციალურ ქსელში წერს, რომ ერთი მაგარი კლუბიც უნდა გაიხსნას სუსის შენობაში მას შემდეგ, რაც სუსი გაუქმდება.

ასე ეხმიანება გორის ჰოსპიტალში მყოფი, პატიმარი ქვეყნის მესამე პრეზიდენტი, საქართველოს მთავრობის გადაწყვეტილებას, რომლის თანახმადაც ღამის კლუბებს გახსნის  უფლება არ მიეცა.

„ქართული კლუბური კულტურა მთელი მსოფლიოს მასშტაბით, ერთ-ერთი მთავარი სახელგანთქმული პროდუქტია, რომლითაც ყველა ვამაყობთ. მე გამიგია ძალიან ბევრი უკრაინელისგან, ევროპელისგან, ამერიკელისგან, რომ თბილისსა და ბათუმს აქვთ მსოფლიოში საუკეთესო ღამის კლუბები. ისინი არიან თავისუფლების კულტურის უმნიშვნელოვანესი ნაწილი.

ესე იგი, წინანდალში 500-კაციანი ქეიფი შეიძლება, ნაძვის ხესთან ათასობით ადამიანი დასაშვებია და კლუბები არა. გასაგებია, რომ მათ ხელოვნურად კლავენ ხან ერთი მიზეზით, ხან მეორეთი.

კიევში თითქმის არ ჩაკეტილა კლუბები და ეპიდემიის დროს ახლებიც კი გაიხსნა და ბევრად ნაკლებია კოვიდით დაღუპულები, ვიდრე თბილისში. ახლა ჩვენ ვკარგავთ პროფესიონალებს და ამ სფეროში ქართველებზე დიდი მოთხოვნაა უკრაინაშიც და ევროპაშიც.

ჩემი სრული სოლიდარობა კლუბების კოლექტივებს. ერთი მაგარი კლუბიც უნდა გაიხსნას სუსის შენობაში მას შემდეგ, რაც სუსი გაუქმდება. გარწმუნებთ, არ ვხუმრობ და მალე გახდებით ამის მომსწრე!“, - წერილი
მიხეილ სააკაშვილის საკუთარ ფეისბუკგვერდზე გამოქვეყნდა.

„კლუბები არ უნდა გაიხსნას - ევროპაში, ერთი-ორმა ქვეყანამ გახსნა, ახლა ხურავენ, რადგან „ომიკრონი“ გამოჩნდა“, - ამბობს დაავადებათა ეროვნული ცენტრის ხელმძღვანელის მოადგილე პაატა იმნაძე.

შეგახსენებთ, საკლუბო სექტორის წარმომადგენლების განცხადებით, 25 დეკემბერს კლუბებში შეზღუდვის მიუხედავად, ღონისძიებების ჩატარებას ცდილობდნენ.  რის გამოც კლუბ "ბასიანი" შრომის ისნპექციამ  10 000-ლარით დააჯარიმა. 

ასევე საინტერესოა:

🔵 ირაკლი ღარიბაშვილი - შობას ვულოცავ ყველა ქრისტიანს, ვინც 25 დეკემბერს აღნიშნავს ამ უდიდეს დღესასწაულს!

🔵 კორონავირუსით კიდევ 76 ადამიანი გარდაიცვალა - როგორია ეპიდვითარება ქვეყანაში

🔵 "მშვიდობა და კეთილდღეობა მოეტანოს ამ დღესასწაულს ყველასთვის" - სალომე ზურაბიშვილი კათოლიკე ქრისტიანებს ქრისტეშობის დღესასწაულს ულოცავს