შალვა პაპუაშვილი: მამუკა ხაზარაძისთვის, რომელიც თაღლითობისთვის არის გასამართლებული და ქონება მევახშეობით დაიწყო, ქველმოქმედება რა არის, გაუგებარია - ხელის გულზე დევს ის ტყუილი, რომელსაც მისი ტელევიზია ავრცელებს

ხელის გულზე დევს ის დეზინფორმაცია და ტყუილი, რომელსაც მამუკა ხაზარაძის ტელევიზია ავრცელებს. ასე რომ, ამას განიხილავს სასამართლო და ჭეშმარიტებას დაადგენს, - განუცხადა ჟურნალისტებს საქართველოს პარლამენტის თავმჯდომარე შალვა პაპუაშვილმა „ტვ პირველის“ წინააღმდეგ ბანკი „ქართუს“ საჩივართან დაკავშირებით.

მისი თქმით, ხაზარაძე ცდილობს, ამგვარი დეზინფორმაციით ბიძინა ივანიშვილს ზიანი მიაყენოს.

„ამ დეზინფორმაციის წყარო არის მამუკა ხაზარაძე - მისი ტელევიზიაა, რომ აწყობს ასეთ თეორიებს. ცნობილი არის, რომ ბანკი ქართუ არის საქველმოქმედო ორგანიზაციის განკარგულებაში და ყველა მისი შემოსავალი სწორედ საქველმოქმედო მიზნებისთვის მიემართება. თუმცა მამუკა ხაზარაძისთვის, რომელიც თაღლითობისთვის არის გასამართლებული და ქონება მევახშეობით დაიწყო, ქველმოქმედება რა არის, გაუგებარია. ამიტომ ის ცდილობს, რომ რამენაირად ასეთი დეზინფორმაციით და ტყუილით ბიძინა ივანიშვილს ზიანი მიაყენოს. ამიტომაც არსებობს სასამართლო, მე მგონი, ხელის გულზე დევს ის დეზინფორმაცია და ტყუილი, რომელსაც მამუკა ხაზარაძის ტელევიზია ავრცელებს. ასე რომ, ამას განიხილავს სასამართლო და ჭეშმარიტებას დაადგენს“, - განაცხადა პაპუაშვილმა.