შიში, რომ Eagle Hills-ის ინვესტიციის განხორციელებით ხალხი აქ ჩამოვა და დასახლდება, უსაფუძვლოა - ირაკლი რუხაძე

შიში, რომ Eagle Hills-ის ინვესტიციის განხორციელებით ხალხი აქ ჩამოვა და დასახლდება, უსაფუძვლოა, – ამის შესახებ Business Insider Georgia-სთან საუბრისას კომპანია Hunnewell Partners-ის დამფუძნებელმა ირაკლი რუხაძემ განაცხადა, რომელმაც კომპანიის მიერ საქართველოში დაგეგმილი საინვესტიციო პროექტები შეაფასა.

„არსებობს დიდი ჯგუფი, რომელიც ნამდვილად დიდი ჯგუფია, გადამოწმებადია და ძალიან სერიოზული ჯგუფია, რომელმაც საქართველოში ინვესტიციის სურვილი გამოთქვა. მე თვითონ პირობები არ ვიცი და ამიტომ ვერაფერს ვიტყვი, მაგრამ შემიძლია ვთქვა იმ შიშების შესახებ, რომლებიც მე მესმის. შესაძლოა, ბევრი შიში იყოს - ერთი მთავარი, რაც არის, ეს არის: გამოიწვევს თუ არა ეს აქ ჩამოსვლას და დასახლებას რაღაც ხალხის, რომელიც შეიძლება იყოს კარგი, შეიძლება იყოს ცუდი. ეს შიში უსაფუძვლოა იმიტომ, რომ, ერთია, ვიღაცამ გააკეთოს ინვესტიცია, მეორეა, ვიღაცას მიეცეს უფლება, რომ აქ ჩამოვიდეს და დასახლდეს. ეს აბსოლუტურად ორი სხვადასხვა განზომილებაა. თქვენ შეგიძლიათ, წახვიდეთ და ამერიკაში ძალიან მარტივად, ჩაუსვლელად იყიდოთ უძრავი ქონება, მაგრამ ეს იმის გარანტიას არ მოგცემთ, რომ ვიზას მოგცემენ, არა თუ დასახლების უფლება მოგცენ. ანუ ქონებრივი საკითხები და რეზიდენტობის, ან ბინადრობის საკითხები არის ორი აბსოლუტურად სხვადასხვა საკითხი, სხვადასხვა ორგანო განიხილავს ამას და ამის ავტომატურად მიბმა არ შეიძლება, თუ რატომღაც გარიგებაში არ წერია ეს.

გარიგება არ გვინახავს და ძალიან ეჭვი მეპარება, რომ ასეთი რაღაც ეწეროს, რომ: თუ ააშენებ, მერე ვისაც გინდა, ბინადრობას მისცემო. ამ უფლებას ძალიან გამიკვირდება, რომ საქართველოს მთავრობა ამ უფლების დელეგირებას გააკეთებდა კერძო ინვესტორისთვის. და ეს თუ არ მოხდა, მაშინ ეს შიში უსაფუძვლოა“, - აცხადებს ირაკლი რუხაძე.