შვეიცარიის კონფედერაციასა და ლიხტენშტაინის სამთავროში საქართველოს ელჩმა ლიხტენშტაინის მემკვიდრე პრინცს რწმუნებათა სიგელები გადასცა

შვეიცარიის კონფედერაციასა და ლიხტენშტაინის სამთავროში საქართველოს საგანგებო და სრულუფლებიანმა ელჩმა, შოთა გეწაძემ რწმუნებათა სიგელები გადასცა ლიხტენშტაინის მემკვიდრე პრინცს, მის უდიდებულესობა ალოისს. აღნიშნულის შესახებ ინფორმაციას საქართველოს საგარეო საქმეთა სამინისტრო ავრცელებს.

მათივე ცნობით, რწმუნებათა სიგელების გადაცემის ცერემონიის შემდეგ გამართულ შეხვედრაზე, ელჩმა მადლობა გადაუხადა პრინცს საქართველოს ტერიტორიული მთლიანობისა და სუვერენიტეტის მხარდაჭერისათვის. საუბარი შეეხო საქართველოს სტრატეგიულ მდებარეობასა და გეოპოლიტიკურ მნიშვნელობას, ხაზი გაესვა ქვეყანაში განხორციელებულ მსხვილ ეკონომიკურ პროექტებსა და სხვა მნიშვნელოვან საკითხებს.

საქართველოს საგარეო უწყების ინფორმაციით, სიგელების გადაცემის ცერემონიის დაწყებამდე, მთავრობის სასახლეში გაცნობითი ხასიათის შეხვედრა გაიმართა ელჩსა და ლიხტენშტაინის ვიცე-პრემიერს, საგარეო საქმეთა, გარემოსა და კულტურის მინისტრ საბინე მონაუნისა და საგარეო საქმეთა ოფისის დირექტორ მარტინ ფრიკს შორის. მხარეებმა ისაუბრეს ორ ქვეყანას შორის არსებულ თანამშრომლობაზე, როგორც ორმხრივ, ისე მრავალმხრივ ფორმატებში. შოთა გეწაძემ კიდევ ერთხელ დაადასტურა საქართველოს მზაობა ევროკავშირში გაწევრიანებასთან დაკავშირებით.