უმაღლესი განათლების რეფორმის შესახებ კანონპროექტს ბიუროს სხდომაზე ორშაბათს წარადგენენ

უმაღლესი განათლების რეფორმის შესახებ კანონპროექტი პარლამენტში რეგისტრირებულია და კანონმდებლებს ორშაბათს ბიუროს სხდომაზე წარედგინებათ. დამტკიცებულია ზოგადი განათლების კონცეფციაც. მმართველ გუნდში აცხადებენ, რომ ზოგადი და უმაღლესი განათლების რეფორმის მიზანი, ეფექტიანი, ეროვნულ ინტერესებზე დაფუძნებული სასწავლო გარემოს შექმნა და ახალგაზრდების მომავლის გაუმჯობესებაა.

„სახელმწიფო არა მხოლოდ ტექნიკურ ცვლილებას ახორციელებს. ეს არის სტრატეგიული ხედვის ნაწილი, რომლითაც მთავარია ჩვენი ახალგაზრდების, ჩვენი ქვეყნის მომავლის გაუმჯობესება. სახელმწიფო იღებს პასუხისმგებლობას მის მიერ გაცემულ დიპლომზე, რომ აქ მიღებული ცოდნით სტუდენტმა შეძლოს იყოს კონკურენტუნარიანი, ამასთან ერთად სახელმწიფო და ეროვნული პრინციპებით გამსჭვალული“, - განაცხადა განათლების, მეცნიერებისა და ახალგაზრდულ საქმეთა საპარლამენტო კომიტეტის თავმჯდომარემ, მარიამ ლაშხმა.

განათლების, მეცნიერებისა და ახალგაზრდულ საქმეთა კომიტეტის თავმჯდომარის პირველი მოადგილე გიორგი ჩაკვეტაძე აცხადებს, რომ ცვლილებებს საკანონმდებლო ორგანოს სრული მხარდაჭერა ექნება.

„3 წლის თავზე ეს რეფორმა უნდა დასრულდეს, რაც ქართულ საგანმანათლებლო სივრცეს განვითარების ახალ ეტაპზე გადაიყვანს. ახლა უკვე კომიტეტში, ასევე სესიების ფარგლებში განვიხილავთ ამ პაკეტს. სრული მხარდაჭერა ექნება იმას, რომ ქართული საგანმანათლებლო სივრცე განვითარდეს, კიდევ უფრო წინ წავიდეს და ყველა სტუდენტს ჰქონდეს ხარისხიანი განათლების მიღების უფლება“, - აღნიშნა ჩაკვეტაძემ.