ევროპას მიგრანტები არ უნდა?!

ევროპას არალეგალური მიგრანტების შესაჩერებლად ზომების გამკაცრება სურს. YouGov-ის მიერ ჩატარებული ბოლო სოციალური კვლევების შედეგებით ევროპელების დიდი ნაწილი დარწმუნებულია იმაში რომ უცხო ქვეყნის მოქალაქეებს ახალ ქვეყანაში ინტეგრაცია არ სურთ.

კვლევების მიხედვით, ამ მოსაზრებას იტალიელთა 51% აფიქსირებს. შვედეთი - 50%, გერმანია - 46%, უნგრეთი კი - 57%. კვლევა იმ კონკრეტულ კითხვებს შეიცავდა, რომლებიც იმიგრაციასთან დაკავშირებული საზოგადოებრივი აზრის სხვადასხვა ასპექტის კვლევისთვისაა საჭირო.

კვლევაში მონაწილე 10 სახელმწიფოდან (გერმანია, იტალია, დიდი ბრიტანეთი, საფრანგეთი, ესპანეთი, შვედეთი, ბელგია, შვეიცარია, პოლონეთი, უნგრეთი) გამოკითხულთა 60% აღნიშნავს, რომ მიგრანტების რაოდენობა გაზრდილია და ეს ერთ-ერთი რთული გამოწვევაა. მიგრანტთა მიმოსვლა რომ მკაცრად გაკონტროლებული არ არის და ისევ არსებობს ,,ღია საზღვრები" ეს არც ევროპელებს მოსწონთ, მით უფრო კი იტალიელ ხალხს.

იმიგრაცია დღემდე ევროპის ერთ-ერთი ყველაზე მნიშვნელოვანი პოლიტიკური საკითხია. ბევრ ქვეყანაში მიიჩნევენ, რომ იმიგრაცია მათი ქვეყნის წინაშე მდგარი ერთ-ერთი ყველაზე რთული გამოწვევაა.

მიგრაციამ გავლენა ბევრ ქვეყანაში მოახდინა კრიმინალურ მდგომარეობასა და უმუშევრობაზე. პოლონეთის და უნგრეთის სახელმწიფოების პოლიტიკა მიგრანტთა წინააღმდეგ მკაცრია და არაჰუმანურიც, თუმცა მათი მოსახლეობის უმრავლესობა ემხრობა არალეგალური მიგრაციის წინააღმდეგ ზომების გატარებას. პოლონეთის მოსახლეობის 58% და უნგრეთის მოსახლეობის 71% ამავე აზრზეა. გერმანიაში ზომების გამკაცრებას ქვეყნის მოსახლეობის 48% ემხრობა, საფრანგეთსა და ესპანეთში კი 36%. 

საინტერესოა ევროპის ქვეყნების ლიდერები  შეთანხმდებიან თუ არა არალეგალური მიგრაციის წინააღმდეგ ბრძოლის გზებზე და შეძლებენ თუ არა საიმიგრაციო კრიზისიდან თავის დაღწევას.

ნონა გედენიძე სპეციალურად ExclusiveTV-სთვის ემილია-რომანიადან