„ღაპაღუპით წამომცვივდა ცრემლები“ - ემიგრანტი მწერალი ემოციურ ისტორიას იხსენებს

მწერალი დინა მირცხულავა, რომელიც ოჯახთან ერთად ახლა ემიგრაციაშია  იმყოფება, სოციალურ ქსელში წერს:

„საბოლოოდ ყველაფერი გავყიდეთ და დედა აქ წამოვიყვანეთ, გამოვიხურეთ სახლის კარები, ჭიშკარს ბოქლომი დავადეთ, ვიდრე ახალი მეპატრონე მოვიდოდა და...

- ძალიან რთულია - აღარ ვიცოდი, რა მეთქვა, საავადმყოფოს მოსაცდელში წუთის წინ გაცნობილი გოგონასთვის, რომელსაც გულის გადაშლა მოუნდა.

- ხშირად მესიზმრება ჩვენი სახლი და ხანდახან მშურს დედასი, რომ არაფერი ესმის, ვერაფერს გრძნობს, ემოციები არ გააჩნია, არ შეუძლია სტკიოდეს, ტიროდეს, განიცდიდეს, რამდენი წელია უძრავად ზის ეტლში და ასე დავატერებთ, ალბათ ის ერთადერთი ვარ, დედას რომ ერბო კვერცხი შევუწვი ხელისგულზე.

- ყავას ხომ დალევ ? - პასუხს არ დაველოდე და აპარატისკენ წავედი, მინდოდა, ცრემლები დამემალა.
ჩემი სახლი, ჩემი ეზო, დედა, მამა, ძმის საფლავი.

სიზმრებიც რომ ერთნაირი გვქონია ?! - გული ყელში მომებჯინა დაბრუნებულო უფრო ახლოს მივუჯექი და ძლივს ამოვღერღე:

- ექიმი რას ამბობს ?

- ვერასოდეს გაივლის, ემოციები არასოდეს დაუბრუნდება, მაგრამ ყველაზე დიდი მიღწევა ის იქნება, რომ ეტლში ჯდომა შეძლოს, უმეტესი დრო წევს, ეტლში კი მხოლოდ რამდენიმე საათს ატარებს, ამისთვის ვიბრძვით ახლა.
გული მომეკუმშა.

- სასწაულების გჯერა ? - ყავა მოსვა და უცებ მომიტრიალდა.

- კი , როგორ არ მჯერა.

- ხომ გითხარი ექიმმა რაც თქვა ?

დავუდასტურე.

- წამოსვლისას ჩემს ძმას ჩვენი სახლისთვის ფოტო გადაუღია, მერე ერთ, ნაკლებად ცნობილ მხატვარს დავახატვინეთ და დედას საწოლის თავთან, პატარა ტუმბოზე დავდგით. ისიც ხომ გითარი, რომ არაფერი ახსოვს და ემოციის გამოხატვა არ შეუძლია ?

-კი, მითხარი - დავიძაბე.

- რამდენიმე დღის წინ აბაზანიდან გამოვედი და ვხედავ, დედა ძირს გდია, ეს ხომ ერთი სასწაულია ? მას არ შეუძლია მოძრაობა და უფრო მეტიც - ნახატი, ჩვენი ეზოს ნახატი გულზე ედო, ხელები ჯვარცმული მაცხოვარივით ჰქონდა გაშლილი და ცრემლები სდიოდა, ხომ გესმის ? ტიროდა, მხოლოდ სასწაულს შეუძლია ეს, სხვაგვარად გამორიცხულია, არ არსებოობს, არაა...... არ გჯერა ხომ ჩემი ? - თვალებში შემომხედა.

- მჯერა - თავის შეკავება აღარ მიცდია და ღაპაღუპით წამომცვივდა ცრემლები.

- როგორ ფიქრობ, ექიმს უნდა მოვუყვე ? ან რა ჰქვია ამას ?

-სამშობლო, სამშობლო ჰქვია - ორჯერ გავიმეორე, მაგრამ აღარ გაუგია, თავქუდმოგლეჯილი გაიქცა მისი გვარის გამოცხადებაზე.

არ ვიცი - ექიმის კაბინეტში მოყვა თუ არა ეს ამბავი, არ ვიცი იმ ოთახში რომელმა გაიმარჯვა - დიაგნოზმა თუ ჩემმა

სამშობლომ, მაგრამ...

შენ, ჰო შენ, სამშობლო რომ გქვია !

ამისთანა რა ძალა გაქვს ?!

რა ძალა გაქვს ამისთანა ?!“, - წერს დიანა მირცხულავა.

ასევე საინტერესოა:

🔵 "თუ გადახედავთ სტატისტიკას, თუ როგორ გამდიდრდნენ ე.წ. ვირუსოლოგები, ეპიდემიოლოგები, აფთიაქები, მედია - მაგნატები, შეკითხვები აღარ დაგრჩებათ"

🔵 ოჯახს 5 თვის განმავლობაში ძიძა სახლში ჰყავდა გამოკეტილი - შოკის მომგვრელი შემთხვევა თბილისში