რა გავლენას მოახდენს ურთიერთობებზე ტრანზიტული მერკური ტყუპებში და რას უნდა მოვერიდოთ - ასტროლოგი ხათუნა ნოელი

"დოკუმენტებზე, ხელშეკრულებებზე, თუ სხვადასხვა საბუთებზე ხელის მოწერა, ტექნიკის შეძენა, მგზავრობა და სხვა მერკურიანული საქმეები, მიზანშეწონილი იქნება," - ასტროლოგი ხათუნა ნოელი, ტრანზიტული მერკურის ტყუპებში ყოფნის პერიოდისთვის რჩევებს გვაძლევს: 

"ტრანზიტული მერკური დღეიდან 5 ივლისამდე ტყუპებში იმოძრავებს. საკუთარი მმართველობის ნიშანში მოხვედრილი  მერკური აქ განსაკუთრებულად კარგად ავლენს თავს. მისი წყალობით ადამიანებში კომუნიკაციის წყურვილი იზრდება, ჩვენ ყველანი უფრო თავისუფლად ვპასუხობთ შემოთავაზებულ კონტაქტებს, ვამყარებთ ახალ ურთიერთობებს, ვსაუბრობთ ჩვენს თავზე, სხვებზე, გარემოზე, ყველაფერზე, რაზეც კი თვალი და ყური მიგვიწვდება და ოდნავ საინტერესოდ ვთვლით...

შედეგად, რაღა თქმა უნდა, იმატებს ინფორმაციის მოცულობა, მაგრამ ეს ახალი ამბები შესაძლოა იმდენად გაფანტული იყოს, რომ დიდხანს არც გაჩერდეს ჩვენს მეხსიერებაში;

ეს პერიოდი ასევე მდიდარი იქნება მოკლე მიმოსვლებით, ვინაიდან ამინდებიც  გაუმჯობესებას იწყებს, ბევრი ქალაქგარეთ პიკნიკებზეც არ იტყვის უარს. მგზავრობის დროს შესაძლოა ახალი ნაცნობობაც გავიჩინოთ...

მათ, ვისაც ტრანზიტული მერკური ნატალურ პლანეტებთან დაძაბულ ასპექტებს შეუქმნის, შესაძლოა არასახარბიელო მომენტებთან მოუწიოთ შეჯახება. მაგალითად, არაა გამორიცხული წვრილმანი ქურდობა, ჭორაობის ობიექტად ქცევა, ან ორპირობასთან და სიცრუესთან დაპირისპირება. შესაძლებელია ვინმემ თქვენით მანიპულირებაც სცადოს, ამიტომ იყავით ფხიზლად...

დანარჩენებისთვის კი, დოკუმენტებზე,  ხელშეკრულებებზე, თუ სხვადასხვა საბუთებზე ხელის მოწერა, ტექნიკის შეძენა, მგზავრობა და სხვა მერკურიანული საქმეები, მიზანშეწონილი იქნება. ამიტომ, თუ რამე მოსაგვარებელი გაქვთ, შეეცადეთ აქედანვე დაიჭიროთ თადარიგი, რომ  ამ საუკეთესო  პერიოდში მოასწროთ და ჩაეტიოთ.

გისურვებთ წარმატებებს!"

წყარო: "ასტროზონა"