„ქვეყნის ცივილიზებულობა სწორედ იმაში მდგომარეობს, რომ ადამიანები დაემორჩილონ კანონს მაშინაც, როცა ეს მათ ინტერესს ეწინააღმდეგება“ - რამაზ საყვარელიძე (ინტერვიუ)

ადგილობრივი თვითმმართველობის არჩევნების მეორე ტური რაც უფრო ახლოვდება, პოლიტიკური დაძაბულობა უფრო და უფრო მატულობს. ჩვენ ვხედავთ,  პოლიტიკური ნიშნით გაერთიანებულ და ამავე დროს დანაწევრებულ საზოგადოებას,  რომელსაც უკეთესი მომავლის იმედი  და  სურვილი აერთიანებს, მაგრამ ქვეყნის პერსპექტივას სხვადასხვაგვარად აფასებს.

რა მოლოდინი შეიძლება გვქონდეს არჩევნების მეორე ტურის შემდეგ, ამასთან დაკავშირებით პოლიტოლოგ რამაზ საყვარელიძეს ვესაუბრეთ.

- როგორ ფიქრობთ, კვლავ პოლიტიზებულ გარემოში მოუწევს მოსახლეობას არჩევანის გაკეთება? რა გავლენას მოახდენს ეს მეორე ტურის შედეგებზე?

- არჩევნები პოლიტიკური მოვლენაა, ხელისუფლებაში მოსვლაზე დიდი მიზანი პოლიტიკაში არ არსებობს, ამიტომ, ბუნებრივია, რომ არჩევნები პოლიტიზებულ გარემოში მიმდინარე პროცესია. ისიც ბუნებრივია, რომ პოლიტიკური კონტექსტი გავლენას მოახდენს მეორე ტურის შედეგებზე. როგორც წესი, მეორე ტურში ადამიანები უფრო გამოკვეთავენ საკუთარ პოზიციას და ნეიტრალურების რიცხვი შემცირდება.

- საზოგადოება, ძირითადად, ორ ნაწილად არის გაყოფილი და არსებული სიტუაციიდან გამომდინარე შეგვიძლია ვივარაუდოთ, რომ არჩევნების ნებისმიერი შედეგი უმცირესობაში დარჩენილი მოსახლეობის ნაწილის პროტესტს გამოიწვევს, რას უნდა ველოდოთ არჩევნების შემდეგ?

- ყველა დემოკრატიულ ქვეყანაში კანონი ადამიანების ნაწილს ტოვებს უკმაყოფილოს. ქვეყნის ცივილიზებულობა სწორედ იმაში მდგომარეობს, რომ ადამიანები დაემორჩილონ კანონს მაშინაც, როცა ეს მათ ინტერესს ეწინააღმდეგება. არჩევნების შედეგების გაპროტესტებასაც აქვს კანონიერი ფორმები. თუ გაპროტესტების კანონიერმა ფორმებმა არ მოუტანა შედეგი უმცირესობას, დასავლური სტანდარტით უმცირესობა ამას უნდა დამორჩილდეს. თუ უმცირესობა არ დაემორჩილება შედეგს, მის წინააღმდეგ ძალის გამოყენება იქნება კანონიერი. თუ ძალამ კანონიერება ვერ აღადგინა, ქვეყანაში იქნება ქაოსი, რითაც ისარგებლებენ ის პოლიტიკური სუბიექტები (ქართული პარტია, სხვა ქვეყანა), რომელთაც კანონით არ ეკუთვნით გავლენის მოპოვება საქართველოზე.

- რამდენად და როგორ აისახება არჩევნების შედეგები საქართველოს საგარეო ურთიერთობებზე?

- თუ არჩევნები ჩატარდა დასავლური სტანდარტით, დასავლეთთან ურთიერთობა კიდევ უფრო გაუმჯობესდება, გაიზრდება ინვესტიციების რიცხვი და ზომა. თუ მოსახლეობის ნაწილი დაუპირისპირდება კანონს და ქვეყანას წაიყვანს ქაოსისკენ, ეს დაამუხრუჭებს დასავლეთთან ურთიერთობას, რაც შედის რუსეთის ინტერესებში.

ესაუბრა ელენე ფერაძე