2 ივნისს იტალია რესპუბლიკის დღეს აღნიშნავს

2 ივნისს იტალიის რესპუბლიკის დაბადების დღეა. მნიშვნელოვანი ეროვნული დღესასწაული და ძალიან საინტერესო დღე.

მეორე მსოფლიო ომის დასრულებისას, სამეფო ოჯახის, სავოიების დინასტიის 85 წლიანი მმართველობის შემდეგ - მათ შორის ბოლო ოცი წელი ფაშისტური დიქტატურისა, იტალიელების ხელში აღმოჩნდა მათი ქვეყნის მომავალი.
იტალიელებს მიეცათ არჩევანის საშუალება - დარჩებოდა ქვეყანა მონარქის მმართველობის ქვეშ, თუ იქცეოდა კონსტიტუციურ რესპუბლიკად.

1946 წელს, პრინცმა, რომელიც მამასთან შედარებით, ფაშისტებისადმი სიმპათიით ნაკლებად გამოირჩეოდა, გაითვალისწინა ხალხის მოთხოვნა და რეფერენდუმის ჩატარებას მოაწერა ხელი. მომზადებას თვეზე მეტი დასჭირდა და 1946 წლის 2 ივნისს რეფერენდუმიც შედგა.

იტალიელების 54,3 პროცენტმა რესპუბლიკის სასარგებლოდ მისცა ხმა. დაახლოებით, ორი მილიონი ხმით გადაწყდა, რომ დასრულდებოდა სავოიების მმართველობა. ეს უკვე დიდი ნაბიჯი იყო დემოკრატიისკენ, რადგან მასში მონაწილეობის უფლება ქალებსაც მიეცათ, რომლებსაც არასოდეს ჰქონიათ საშუალება ჩარეულიყვნენ ქვეყნის ბედის მართვაში.
ეს იყო ერთგვარი თანასწორობის მაგალითიც, რადგან თანასწორობის გარეშე არ არსებობს დემოკრატია, დემოკრატიის გარეშე კი ცხადია ვერ შედგება ნამდვილი რესპუბლიკა. მონარქმა ქვეყანა დატოვა. შეიქმნა დროებითი მთავრობა და დაიწყო კონსტიტუციაზე მუშაობა.

1948 წლის იანვარში უკვე ძალაში შევიდა ფუნდამენტური მცნებებით - რესპუბლიკა, დემოკრატია, თანასწორობა.
2 ივნისი კი იტალიის რესპუბლიკის დღედ გამოცხადდა. ამ დღეს რამდენიმე სიმბოლური ტრადიციით აღნიშნავენ. მნიშვნელოვანია პატივის მიგება იმ ადამიანების ხსოვნისადმი, ვინც იტალიის თავისუფლებისთვის სიცოცხლე შესწირა. ამიტომ ქვეყნის პრეზიდენტი დედაქალაქში გვირგვინით ამკობს უცნობი ჯარისკაცის საფლავს.

შემდეგ კი არა მხოლოდ იტალიელებისთვის, არამედ ყველასთვის ძალიან საყვარელი შოუ იმართება, შოუ „Le Frecce Tricolori“. აკრობატი მფრინავების საჰაერო სანახაობა, რომლებიც ცაზე იტალიის დროშის ფერებს ტოვებენ.

ესაა ძალიან ცნობილი - იტალიის სამხედრო აერონავტიკის ჯგუფი, რომელიც 1961 წელს შეიქმნა. ერთგვარი ეროვნული აკრობატული პატრული, რომელიც სამკუთხა ისრის ფორმით, და არა მხოლოდ, გასაოცარ მანევრებს ასრულებს და ულამაზეს შოუს დგამს.

წყარო: Milano